Lenovo смартфон ишлаб чиқаришни тўхтатади

Хитойнинг Lenovo компанияси шахсий бренди остида смартфон ишлаб чиқаришни тўхтатиши мумкин. Бу ҳақида Gizmochina нашри маълум қилди. 

Манбага кўра, яқин орада Lenovo'да ўзгаришлар кутилмоқда. Компаниянинг кейинги моделлари Moto бренди остида ишлаб чиқарилади. Аввалги номи билан чиқарилган сўнгги қурилма 8 ноябрда Хитойда тақдим этиладиган P2 модели бўлади. У билан бир вақтда янги Moto M анонси бўлиб ўтади. 

Компанияда Lenovo бренди остида смартфонлар ишлаб чиқарилишнинг тўхтатилиши расман тасдиқланмади. Тахминларга кўра, P2 тақдимотида бу ҳақида маълум қилинади. 

Манбага кўра, 2014 йилнинг январида Lenovo компанияси Google'дан 2,91 миллиард долларга мобил телефонлар ишлаб чиқаришга ихтисослашган Motorola Mobility бўлимини сотиб олган. Lenovo билан тузилган битим шартномасига кўра, Америка интернет-компанияси Motorola Mobility патентларини ўзида сақлаб қолади.