Россиянинг Саратов вилоятида ўн ёшли болани “ўз жонига қасд қилишга олиб бориш” бўйича жиноят иши қўзғатилди. Бу ҳақда РФ ТҚ ҳудудий бошқарма сайтида хабар берилган.
Таъкидланишича, отаси фарзандининг жасадини уйда аниқлаган. Тахминларга кўра, бола ўз жонига қасд қилган, шу билан бирга ҳеч қандай мактуб қолдирмаган. Терговчилар унинг танасида ҳеч қандай жароҳатларни аниқламади.
Маълумотларга кўра, бола ўз оиласи билан вилоятнинг Рибушка аҳоли пунктида яшаган. Ушбу воқеадан бироз аввал эса ота-онаси унга ижтимоий тармоқлардан фойдаланишни тақиқлаб қўйган. Улар шу йўл билан фарзандларини болаларни ўз жонига қасд қилишга ундовчи “ўлим гуруҳлари” таъсиридан чиқариб олишмоқчи бўлган.
Kun.uz изоҳи: Ҳурматли ота-оналар! Хабар сўнгида ўз фарзандларингизга янада эътиборлироқ бўлишингизни сўраб қолган бўлардик. Ўз болангизнинг интернет ва ундаги турли ижтимоий тармоқлардан фойдаланишини жиддий назорат остига олинг. Зеро, бугунги кундаги замонавий технологиялар бир томондан қулайлик туғдирса-да, бошқа томондан ундаги турли бир қатор зарарли саҳифалар анча хавфли ва оғир оқибатларга олиб келиши мумкин. Фарзандингиз тарбияси ва келажаги бевосита сизга боғлиқ эканини унутманг!
