Порошенко: “Энди 9 майни Москва сценарийси бўйича нишонламаймиз”

Украина президенти Пётр Порошенконинг маълум қилишича, мамлакатда 9 май байрами аввалгидек қолади, бироқ у “Москва сценарийси” бўйича нишонланмайди. Бу ҳақда «Украинские новости» хабар берди.

Унинг сўзларига кўра, украиналиклар нацизм устидан қозонилган ғалабанинг тўла ҳуқуқли иштирокчилари саналади.

“Ўша йиллар ҳақидаги аччиқ хотиралар бизни тарк этмаяпти, авлоддан авлодга ўтиб бормоқда. Бу байрам бор эди ва бундан кейин ҳам бўлади, бироқ биз уни энди Москва сценарийси бўйича нишонламаймиз”, - деган у.

Шунингдек, Порошенконинг маълум қилишича, Иккинчи жаҳон урушида “собиқ Советлар Иттифоқи халқлари биргаликда жанг қилишган”.

Шу билан бирга, унинг қўшимча қилишича, бу уруш “ўзига хос, украинча ўлчовга ҳам эга эди, у эса биз учун асосийдир”.