Хитой гиперкари Нюрбургрингнинг энг тез машинаси бўлди

Фото: motor.ru

Хитойнинг Nio компанияси ишлаб чиққан EP9 электр гиперкари Нюрбургрингнинг энг тез машинаси бўлди. 1360 от кучига эга машина «Шимолий халқа»ни 6 дақиқа 45,9 сонияда айланиб чиқди. Бу эса Lamborghini Huracan Performante кўрсатган натижадан 6 сонияга яхшироқдир.

Nio EP9 гиперкарини ушбу рекорд юриши чоғида «Ле-Манда 24 соат» пойгасининг 2013 йилдаги бронза медали совриндори, шотландиялик Питер Дамбрек бошқарди. Бироқ, ишлаб чиқарувчи мазкур натижа қайд этилган видеони намойиш этгани йўқ.

The NIO EP9 and I broke the production car record around the Nordschleife today. Mega (Watt) effort by all in production of this car! pic.twitter.com/0UOcyyujqd
— Peter Dumbreck (@AhLovejoy) May 12, 2017

EP9 купеси 4та электр двигатели билан жиҳозланган. У турган жойидан соатига 100 км тезликка 2,7 сонияда эришади, 7,1 сонияда 200 км/с тезликка чиқади. Моделнинг энг юқори тезлиги соатига 313 кмни ташкил этади. Батареялар қуввати 425 кмга етади.

Nio компанияси ҳар бирининг нархи 1,48 млн доллар турувчи 10 дона EP9 ишлаб чиқаришини маълум қилди.

2017 йил мартида Nio EP9 Нюрбургрингда электромобиллар таснифида рекорд ўрнатганди. Ўшанда у «Шимолий халқа»ни 7 дақиқа 5,12 сонияда айланиб чиққан эди. Бундан аввал, бу борадаги энг юқори кўрсаткич Toyota компаниясининг EV P002 прототипига тегишли эди. У Германиядаги пойга трассасини 7 дақиқа 22,329 сонияда айланиб чиққанди.

#рекорд #Nio EP9 #Нюрбургринг