«Қирол Лео» 30 ёшда!

«Барселона» ва Аргенитина терма жамоаси етакчиси Лионель Месси бугун туғилган кунини нишонламоқда.

Аргентиналик замонавий футболнинг энг номдор футболчиси, 5 карра «Олтин тўп» соҳиби бугун 30 ёшга тўлди.

Месси – «Барселона» ва Аргентина терма жамоаси тарихидаги энг яхши тўпурар саналади. 17 йилдан буён каталонияликлар асосий таркибида тўп суриб келаётган Лео 4 карра Европа чемпионлар лигаси ғолиби, 8 карра Испания чемпиони, 3 карра клублар ўртасидаги жаҳон чемпиони, 5 карра Испания кубоги, 6 карра Испания суперкубоги, 3 карра Европа суперкубоги соҳиби бўлган. Аргентина ёшлар терма жамоаси билан жаҳон чемпиони ва Олимпиада ўйинлари олтин медалини қўлга киритган.

5 карра «Олтин тўп», 4 марта «Олтин бутса» совринини, ЖЧ-2014нинг энг яхши футболчиси, уч карра УЕФА томонидан мавсумнинг энг яхши футболчиси, 6 карра Ла-лиганинг энг яхши футболчиси, 7 карра Испания чемпионати тўпурари, икки карра клублар ўртасидаги ЖЧ тўпурари каби жуда кўплаб совринларни қўлга киритган.