Эътиборингизга сайёҳ, танқидчи Бен Шалпигнинг Нью-Йорк-Тошкент йўналишидаги тўхтовсиз парвоздан олган таассуротларини тақдим этамиз. Бу билан миллий авиакомпаниянинг айрим камчиликларни бартараф этиб, ютуқларни кенгайтиришга чақирамиз.
«Биз ҳаво кемасига қўйилган йўлак орқали иккинчи эшикка кўтарилдик, йўловчиларни хушмуомала стюард қарши олиб, чап тарафдаги жойимни кўрсатиб юборди. «Ўзбекистон ҳаво йўллари» харид қилган Boeing-787 ҳаво лайнерининг бизнес класс бўлагида 24 нафар йўловчи учун мўлжалланган жойлар 2-2-2 тартибида жойлаштирилган. Борт ходимларининг хизмат кўрсатиш сифатини кузатиб бориш учун уч қатор бўйлаб жойлаштирилган ўриндиқларнинг олд жойини эгалладик.
Янги типдаги 787 самолётида бизнес класс ўриндиқлари олд тарафга қараб мослаштирилган бўлиб, бундай мослашув AZAL Azerbaijan, LOT Polish, Xiamen авиакомпанияларида ҳам учрайди, аммо бу замонавий ҳаво кемаларида йўловчи ташишнинг энг ёмон кўриниши бўлса керак.
Асосий мақсадим - 787 бортида хизмат даражасини кузатиб бориш. Аммо ўрнимни эгаллашим билан стюардесса менга яқинлашиб, ҳаво кемасида фотоаппарат ишлатиш, умуман суратга олиш мумкин эмаслигини айтиб, огоҳлантириб кетди. Бу эса минглаб км масофани босиб ўтиб, турли авиакомпаниялар хизматидан фойдаланганимдан сўнг илк бор янграб турган тақиқ эди. Кейинроқ, «Ўзбекистон ҳаво йўллари» ҳақида йўловчиларнинг таассуротларини ўқиб чиқдим, уларнинг биронтаси ҳам бу камчилик ҳақида сўз очмаган. Балки борт ходимлари парвоз чоғи қизиқарли ҳолатларни суратга туширишимни «кўрмай» қолар?! Шунга қарамай, борт ходимлари тарқатган таом ва ичимликларни телефон орқали тарихга муҳрлаб боришга муваффақ бўлдим.
Ўриндиқлар стандарт бўйича ишлаб чиқарилган, машҳур авиакомпаниялар сингари қўшимча қулайликлар билан жиҳозланмаган.
