Оқ уй чоршанба куни Конгрессга бу йил Америка Қўшма Штатларига ёпирилган Ҳарвей, Ирма ва Мария довуллари туфайли жабр кўрган ҳудудларга ёрдам бериш учун федерал бюджетдан 29 миллиарддан кўпроқ маблағ ажратиш учун расмий талабнома жўнатди. Бу ҳақда президент Дональд Трампнинг маъмурияти вакили хабар қилган.
"Ҳа, биз фалокатдан сўнг ёрдам бериш фондига 12,77 миллиард доллар, сув тошқинидан жабрланганларга суғурта пулларини тўлаш учун 16 миллиард доллар ва ўрмон ёнғинларига қарши курашни молиялаштириш учун 577 миллион доллар талаб қилдик", - деган у.
Жами 29 миллиард доллардан 16 миллиарди сув тошқини оқибатида уйларидан айрилган давлат дастури иштирокчиларга суғурта пулларини тўлаб беришга кетади. Эндиликда улар давлатдан пул компенсациясини олиш ҳуқуқига эга, аммо ҳозирда дастурни амалга ошириш учун ажратилган бюджет деярли тугади.
Қолган 13 миллиард доллар табиий офат оқибатларини бартараф этиш билан бевосита шуғулланувчи Фавқулодда вазиятлар бўйича федерал бошқармага мўлжалланган.
Бироқ, бу 29 миллиард доллар федерал бюджетдан жабрланганларга ёрдам беришга йўналтирилган сўнгги транш эмас. Оқ уйдан қайд этишганидек, бу йил ўнлаб миллиард доллар, асосан, турар-жой биноларини тиклаш учун талаб қилинади. Бундан ташқари, Пуэрто-Рикода бутун электр тармоғини қайта тиклаш лозим.
"Ҳарвей" довулидан Техас биринчи ўринда сезиларли даражада зиён кўрди. "Ирма" ва "Мария" эса Кариб минтақаси бўйлаб зарба бериб, Флорида қирғоқларига ҳам зарар етказди.
