Порошенко: Украина НАТОга албатта аъзо бўлади

Украина президенти Пётр Порошенконинг ишонч билдиришича, Украина НАТО аъзосига айланади. У бу ҳақда Киевдаги Иван Богун номидаги ҳарбий лицей ўқувчиларининг қасамёд маросими вақтида айтиб ўтди, деб хабар бермоқда «Интерфакс-Украина».

«Ҳеч шубҳа йўқки, ёшига қараганда анча катта кўринадиган бу ўсмирлар келажакда зобитлар ва генераллар, элчилар ҳамда вазирлар бўлишади. Балки, бўлажак президент ҳам шу ерда тургандир. Ва ҳаттоки – НАТО бош котиби ҳам, сабаби Украина албатта альянс аъзосига айланади», - дея маълум қилди Порошенко.

Шунингдек, Украина раҳбарининг маълум қилишича, мамлакат қуролли кучларига 14 октябрь куни 200 та ҳарбий техника, жумладан 62 та танк топширилади.

«Бугун мен шу ердан тўғри қўшинларга йўл олиб, у ерда қурол-яроғ ва техниканинг навбатдаги партиясини топшираман. Техникалар орасида 62 та танк бор», - дея маълум қилди Порошенко.

Шунингдек, у украиналик барча ҳарбийларга «қаҳрамонлик, жасорат ва фидойилик учун» миннатдорчилик билдирган.