«Tashkent City» халқаро бизнес марказининг концепцияси тасдиқланди (фото)

Алишер Навоий, Ислом Каримов шоҳкўчалари ҳамда Фурқат ва Олмазор кўчалари ўртасидаги 80 гектар майдонда жойлашиши мўлжалланган «Tashkent City» халқаро бизнес марказининг концепцияси тасдиқланди.

Бизнес марказнинг Facebook’даги саҳифасида таъкидланишича, «Tashkent City» концепцияси сейсмик ҳолат, Тошкент шаҳрининг архитектура қиёфаси, Марказий Осиёдаги шаҳарсозлик қурилишининг барқарор анъаналарини ҳисобга олган ҳолда, табиат ва замонавий урбанистик ғоялар уйғунлигида ишлаб чиқилган. 

Бизнес офислар, меҳмонхоналарга мўлжалланган биноларни замонавий технологиялар асосида 40 қаватдан баланд бўлмаган қилиб, турар-жойларни эса 12 қаватдан юқори бўлмаган тарзда қуриш режалаштирилган. Бундан ташқари, бу ерда конференция ва кўргазма марказлари, гипермаркет, кўплаб савдо майдонлари, ресторан ва кафелар, ер ости автотураргоҳлари барпа этилиши режалаштирилган.

Эслатиб ўтамиз, Ўзбекистон бош вазири Абдулла Арипов Tashkent City Халқаро бизнес марказини қуриш бўйича Маъмурий кенгашга раҳбарлик қилади.