Моуриньо ўз вақтида «Барселона»ни бошқариши мумкин бўлгани ҳақида гапирди

«Манчестер Юнайтед» жамоаси бош мураббийи Жозе Моуриньо мураббийлик фаолиятида босиб ўтган йўлини эсга олиб, 2008 йилда нега «Барселона»га ўтмаганини айтишга тайёр эмаслигини таъкидлади.  У шунингдек, «Реал» ва «Интер»да орттирган тажрибаси ҳақида ҳам гапирди.

«Балки қачонлардир «Барселона»га нега ўтмай қолганим тўғрисида ҳақиқатни айтарман, аммо ҳозир эмас. Фаолиятимдаги бу воқеани ошкор қилмай тураман. Балки, қариб-қартайиб қолганимда гапириб берарман.

«Реал»га ўтиш учун ноқулай вақт танлаган бўлишим мумкин, чунки, ўша пайтда «Барселона» жуда кучли эди. Аммо, «Реал»га ўтишни ўзим истаганман. Бу клубни тарк этиш ҳақидаги қарорни ҳам ўзим қабул қилганман. Қизим Лондонда ўқимоқчи эди ва оиламиз билан бирга бўлсак, яхшироқ бўлишини англаб етганмиз. Менга ўзимни яхши ҳис қилишим, бахтиёр бўлишим муҳимроқ. «Реал»да ишлаган учинчи мавсумимда эса бахтиёр эмасдим.

«Интер»даги ишим ўзига хос тажриба, севги романи эди. У ерда фантастик жамоани йиққанмиз. Бу ўша пайтдаги «Интер» футболчиларига ниманидир қўлга киритиш учун сўнгги имконият эди. Биз мухлисларимизга ажойиб лаҳзаларни, қувончни тақдим қилгандик», - дея Моуриньонинг сўзларини келтирган Telefoot.