Ўзбекистонда ЭИЗ ва КСЗ бошқарувининг янги тизими жорий этилади

Президентнинг 25.10.2017 йилдаги ПҚ–3356-сон «Эркин иқтисодий зоналар ва кичик саноат зоналари фаолияти самарадорлигини оширишнинг қўшимча чора-тадбирлари тўғрисида»ги қарори эълон қилинди. Бу ҳақда Norma.uz хабар бермоқда.
 
ЭИЗ ва КСЗ бошқарувининг янги тизими 1.12.2017 йилдан жорий этилади. У қуйидагиларнинг янгиланган тартибини кўзда тутади:

•  инвестиция лойиҳаларини саралаб олиш;
•  ер участкаларини тақдим этиш;
•  хомашё ва материалларни олишни таъминлаш;
•  ЭИЗда жойлашадиган тадбиркорлик субъектларига кредит ресурсларини ажратиш.
 
Кўрсатилган санагача ҳудудларнинг мавжуд минерал-хомашё, ер, сув, қишлоқ ресурслари, ишлаб чиқариш ва экспорт салоҳияти, экологик шароитларини инобатга олган ҳолда ҳар бир ЭИЗнинг соҳавий ихтисослашуви аниқланади. Икки ой муддатда ҳар бир ЭИЗга уларнинг соҳаларга оид ихтисослашувини инобатга олган ҳолда хорижий инвесторларни жалб этиш бўйича «йўл хариталари» ишлаб чиқилади.
 
ЭИЗ ва КСЗ фаолиятини мувофиқлаштириш бўйича ҳудудий комиссиялар Қорақалпоғистон Республикаси, вилоятлар ва Тошкент шаҳри ЭИЗ ва КСЗ фаолиятини мувофиқлаштириш бўйича маъмурий кенгашлар тарзида қайта тузилди. Уларнинг фаолиятини мувофиқлаштириш билан янги тузилган Республика кенгаши шуғулланади.
 
ЭИЗ иштирокчиларига қўшимча имкониятлар берилган. Хусусан, уларга қуйидагиларга рухсат этилган:   

•  давлат ихтиёрида бўлган тўхтаб турган корхона ва мол-мулкни “нуль” қиймати бўйича инвестицион мажбуриятларни олган ҳолда сотиб олиш;
•  ўз ишлаб чиқариш эҳтиёжлари учун зарур бўлган биржа товарларни (хомашё, материаллар, ярим тайёр маҳсулотлар ва тайёр маҳсулотлар) тўғридан-тўғри шартномалар бўйича бозор нархида сотиб олиш;
•  Инвестициялар бўйича давлат қўмитасида экспертизадан ўтказмасдан импорт шартномалари тузиш. Бу имконият 1.11.2017 йилдан бошлаб тадбиркорлик субъектлари – устав капиталларида давлат улуши бўлмаган, банклар томонидан Тикланиш ва Тараққиёт жамғармасининг кредит линиялар ҳисобига молиялаштириладиган ЭИЗ иштирокчиларига берилади.
 
Бундан ташқари, «Навоий», «Ангрен», «Жиззах» ЭИЗ ва янги тузилган ЭИЗ дирекциялари зоналар фаолият юритадиган барча давр учун солиқ ва бошқа давлат мақсадли жамғармаларига мажбурий тўловлардан озод этилади.
 
1.03.2018 йилдан бошлаб инвесторларга ЭИЗ, инвестицион лойиҳалар ва бошқа хизматлар ҳақида маълумотлар етказилишини таъминловчи Ўзбекистон Республикаси ЭИЗ ва КСЗ ягона порталини тузиш режалаштирилган.
 
Ҳужжат 25.10.2017 йилдан кучга кирди.