Жароҳатлар Гарет Бэйлнинг фаолиятига жуда катта тўсиқ бўлмоқда. Ўтган ҳафта уэльслик ҳужумчи «Реал» таркибига келиб қўшилгандан сўнг, 19-жароҳатини олди. Испаниялик журналистлар эринмай ҳисоблаб ҳам кўришди – Гаретнинг Мадрид клубидаги ҳар бир ўйини «Реал»га бир миллион евродан қимматроққа тушмоқда экан. Маоши ва трансфер қиймати биргаликда 168.6 миллионни ташкил қиладиган Бэйл шу пайтгача «Реал» сафида 159 ўйинда майдонга тушган холос.
Испаниянинг AS нашрида ёзилишича, бу жароҳатлар «Реал»нинг ҳам жонига теккан ва футболчи январь ойидаёқ трансферга қўйилиши мумкин. Ёзда 150 миллион евродан камига сотилмаслиги айтилган 28 ёшли футболчи учун энди 70 миллион евро олишга ҳам розилар. Бу пулларни Перес навбатдаги супертрансферлар учун ишлатиши мумкин. Бэйлни қайси жамоалар сотиб олиши мумкинлиги ҳақидаги тахминларни кейинга қолдирайлик-да, эътиборингизга championat.com сайти версиясига кўра, Гаретнинг ўрнини босиши мумкин бўлган 5 футболчини ҳавола қиламиз.
Лерой САНЕ (Манчестер Сити)
Нархи: transfermarkt.com маълумоти бўйича 45 миллион евро
«Реал» учун энг арзон вариант. Агуэро ва Де Брюйне фонида Лерой Сане у қадар ёрқин порламаётган кўриниши мумкин, аммо статистика бунинг аксини кўрсатмоқда – Сане Премьер Лиганинг 11 ўйинида 11 голда (6 гол, 5 ассист) бевосита иштирок этди. Германия терма жамоасининг бўлажак юлдузи, яхшигина техника ва тезликка эга бўлган Сане «Реал»да Бэйлдан қолишмаслигини кутса бўлади.
Дарвоқе, Санени бутун Европа айнан Мадриддаги ўйин орқали таниганини эсласангиз керак. Европа Чемпионлар Лигасида «Шальке» сафида Мадридга ташриф буюрган Лерой Сане сал қолса, ўша ўйинда «Реал»ни чорак финалда қолдириб кетарди.
Пауло ДИБАЛА (Ювентус)
Нархи: transfermarkt.com маълумоти бўйича 70 миллион евро
Дибала ёшлигидан «Барселона»га бўлган севгисини яширмайди. Бу жиҳат Дибаланинг Мадридга келишини янада қийинлаштириши мумкин. Аммо шу билан бирга, «Реал»нинг кучини ҳам намойиш қилади – Перес бунақа «понт»ларга қизиқишини биламиз.
