КХДР Жанубий Корея билан вақтинчалик сулҳ ҳақидаги келишувни бузгани маълум қилинди

Фото: KCNA

КХДР ҳарбийлари Жанубий Корея билан 1953 йилда имзоланган вақтинчалик сулҳ ҳақидаги келишувни бузишди. Бу жанубга қочиб кетган аскар таъқиб қилинганида юз берган, деб хабар бермоқда «Рёнхап».

Жанубий Кореядаги БМТ Қўмондонлиги мутахассислари аскарнинг чегарадан ўтиши тасвирланган видеоёзувни кўриб, шундай хулосага келишган. Кадрлардан кўриш мумкинки, Шимолий Кореянинг қуролланган чегарачиси қўлида милтиқ билан демаркация чизиғидан кесиб ўтган. Бундан ташқари, ҳарбийлар қочиб кетаётган аскарга қарата ўт очишган.

Қўмондонликдан таъкидлашларича, жанубий кореялик ҳарбийларнинг жавоб ҳаракатлари келишувга мос тушган.

Шифокорларнинг қайд этишича, қочиб ўтаётган пайтида яраланган аскар ўзига келган. Унинг аҳволи ҳозирда қандай экани очиқланмаган.

#КХДР #Жанубий Корея