Эрдўған АҚШни Туркияни жазолашга уринишда айблади

АҚШ Туркияни жазоламоқчи ва обрўсизлантирмоқчи, чунки Туркия унга ташқаридан суқиштирилаётган сценарийларга бўйсунмаяпти. Бундай фикрни Туркия президенти Ражаб Тоййиб Эрдўған билдириб ўтди.     

“АҚШ бизни жазолаш, қоралаш ва обрўсизлантиришга ҳаракат қилмоқда, чунки биз уларнинг сценарийларига амал қилмаяпмиз. Бу сценарийларнинг мақсади ойдин ва давлатимиздаги одамлар ёрдамида амалга оширилмоқда. Улар буни ФЕТО билан бирга қилмоқдалар. Бироқ улар бизни алдай олмасликларини билишлари керак”, деб айтган Эрдўған Агра шаҳридаги чиқиши вақтида.

Эрдўған, шунингдек, Вашингтонни Туркияда тақиқланган Курдистон ишчи партиясини қўллаб-қувватлашда айблади. “Бу сценарийнинг бир қисми АҚШда Туркия фуқароларига қарши судлар ҳисобланади. Бизнинг номимизга айтилаётган бу ёлғон, бўҳтон ва ҳужумлар оқими мамлакатни тиз чўктиришга ва жамиятимизга парокандаликни киритишга қаратилган бир сценарийнинг қисмидир. Бу уринишларнинг барчаси барбодлик билан тугайди”, деб қўшимча қилган Эрдўған.       

Аввал Эрдўған АҚШни террорчиликка қарши кураш кўриниши остида Яқин Шарқда ўзи учун керакли бўлган тартибни ўрнатмоқчи бўлаётганликда айблаганди. Жумладан, Эрдўған Вашингтон ИШИДга молиявий кўмак кўрсатаётганини ва Раққадан террорчиларнинг олиб чиқилишига алоқадор бўлиши мумкинлигини таъкидлаб ўтган.