Самарқанд вилоятида кам таъминланган оилалар, ўзгалар кўмагига муҳтож фуқаролар, чин етим ва ногиронларни ҳар томонлама қўллаб-қувватлаб, уларга муносиб турмуш шароити яратиб беришга алоҳида эътибор қаратилмоқда.
Вилоятда жорий йилда ана шу мақсадда 142 нафар фуқаронинг уй-жойлари бошланғич бадал тўловлари ҳомийлик маблағлари ва бошқа манбалар ҳисобидан тўлаб берилди.
Самарқанд шаҳрида бўлиб ўтган тадбирда Янги йил байрами арафасида 33 кишига ана шундай уйларнинг калити топширилди.
Вилоят ва шаҳар ҳокимлиги, шаҳар фаоллари ва фуқаролар иштирок этган тантанали тадбирда сўзга чиққан вилоят ҳокими Туробжон Жўраев ушбу маскан давлат маблағлари ҳисобидан реконструкция қилиниб, жиҳозланиб топширилаётгани, уйда профилактика инспектори, шифокор кабинети, маданият ва маърифат хоналари ҳам ўрин олганлигини таъкидлаб ўтди.
Вилоят ҳокими йиғилганлардан буларнинг барчаси Президентимизнинг Янги йил совғаси ўлароқ қабул қилишни сўраб, янги уй соҳибларининг хонадонларига барака тилади ҳамда уйларнинг калитини тантанали равишда топширди. Қайд этиш жоизки, энди ушбу уйда турли миллат ва элат вакиллари истиқомат қилишади.
Янги хонадон соҳибларидан сўзга чиққан шоир Абдуҳамид Абдуманнонов, Севара Нурмуродова, Манзура Ахтамова, Мадина Турсунова ногиронлиги бўлган инсонларга давлат даражасида қаратилаётган эътибор, иззат-икром учун чексиз миннатдорчилигини изҳор этишди.
— Мен ногирон бўлиб қолганимдан сўнг катта тушкунликка тушиб қолдим. Ҳаёт мен учун тўхтаб қолган эди. Келажакка бўлган умидларим буткул сўниб бўлган эди, — дейди Паст Дарғом туманида яшовчи Севара Нурмуродова. — Ҳозир менга қаратилаётган эътибор туфайли ўзимни мутлақо ногирон ҳисобламаяпман. Мени шу жамиятнинг тўлақонли аъзоси даражасига кўтаришди. Умид ва ишонч беришди. Бизларга чексиз меҳрибонлик кўрсатаётган Президентимиздан миннатдорман.
Шу ерда йиғилган ногиронлиги бўлган болаларга аравачалар ва Президентнинг янги йил совғалари ҳам топширилди.
Ушбу уйни капитал реконструкциядан чиқарган қурувчилар ҳам эътироф ва эътибордан бебаҳра қолишмади. Уларга миннатдорчилик рамзи сифатида тўн кийгиздирилди.
Янги уйни тантанали очилиш маросими бўлиб ўтиб, ленталар кесилди ва меҳмонлар ичкарига таклиф этилди.
Собиқ ётоқхона 1 хонали уйларга мослаштирилган. Бу хонадонлар замонавий усулда таъмирланиб, улар зарур уй ва ошхона мебель жиҳозлари, гиламлар билан таъминланган. Уйда профилактика инспектори Акмал Баратовга ҳам икки хонали квартира тақдим этилган. Иссиққина хонадонда тўкин дастурхон атрофида инспектор оиласи ва меҳмонлари билан жамулжам.
Шунингдек, бинода маданият ва маърифат хонаси бор. Бошқалар қаторида янги уйнинг калитини олган Муҳаббат Ғуломова ҳам уй бошқарувчиси, ҳам маънавият хонасини юритишини айтиб ўтди. 7-оилавий поликлиника шифокорлари ҳам шу уйда яшовчи инсонларнинг соғлиқларидан бохабар бўлиб туриши учун шифокор хонаси ҳам ташкил этилган. Уй ҳовлисида болалар майдончаси, автотураргоҳлар барпо этилган. Энг муҳими, бу уйга элтувчи йўлларга янги асфальт ётқизиб берилди.
Тадбир иштирокчилари тўкин дастурхон атрофига таклиф этилиб, ош сузилди, Самарқанднинг донгдор хонандалари М.Мавлонов ва Э.Қайтаров ўзларининг дилбар қўшиқларини йиғилганларга инъом этишди.
Бундай тадбирлар вилоятнинг Пайариқ, Каттақўрғон ва Нарпай туманларида ҳам давом эттирилди.
Шуҳрат Шокиржонов
KUN.UZ мухбири
