АҚШ давлат котиби 1 ҳафта ичида 4 давлатга боради 

АҚШ давлат котиби Рекс Тиллерсон Европа давлатлари бўйлаб бир ҳафталик турнени амалга оширади. Бу ҳақда Қўшма Штатлар Давлат департаменти хабар берди.

Тиллерсон 21-27 январь кунлари Буюк Британия, Франция, Швейцария ҳамда Польшага боради.

Турне Лондонга ташрифдан бошланади, у ерда Америка дипломатияси етакчиси Буюк Британия ТИВ раҳбари Борис Жонсон билан учрашади. Эрон, Сурия, Ливия, Украина ва КХДР мавзусини муҳокама қилиш режалаштирилган.

Парижга Тиллерсон 23 январь куни келиб, Франция ҳукумати вакиллари билан музокаралар ўтказади.

24-26 январь кунлари эса давлат котиби Швейцариянинг Давосидаги Бутунжаҳон иқтисодий форумида иштирок этади.

Турне 26 январь куни, Тиллерсоннинг Варшавадаги музокаралари билан якунланади.