КХДР Жанубий Кореяни узр сўрашга чақирди

Фото: Reuters

Жанубий Корея ҳукумати Сеулда КХДР байроғи ва Ким Чен Иннинг фотосурати ёқиб юборилгани учун узр сўраши керак. Бу ҳақда Шимолий Кореянинг Москвадаги элчихонаси хабарида айтилади, деб маълум қилмоқда РИА «Новости».

«Жанубий Корея ҳукумати бутун миллатга қарши ҳозирги сиёсий фитна учун узр сўраши, жиноятчиларни жазога тортиши ва бундай ҳолатлар юз бермаслиги учун тегишли чораларни кўриши лозим.

Бу бизнинг яхши ниятимиз ва Кореялараро муносабатларни соғломлаштириш бўйича саъй-ҳаракатларимизга нисбатан қабул қилиб бўлмайдиган таҳқирлаш ҳамда Олимпия ўйинларига киритмасликка йўналтирилган сиёсий фитнадир.

Биз Кореялараро муносабатларни қадрлаймиз, бироқ ўтакетган мутаассибларнинг бундай хатти-ҳаракатини жим кузатиб тура олмаймиз», - дейилади КХДР элчихонаси хабарида.

Эслатиб ўтамиз, аввалроқ Сеулда фаоллар Ким Чен Ин фотосуратини КХДР делегацияси раҳбари кўз ўнгида ёқиб юборишгани хабар берилганди.