Тожикистонда эрининг қариндошларини «заҳарлаб ўлдирмоқчи» бўлган аёл 18 йилга қамалди

Тожикистоннинг Хатлон вилояти суди Панж туманининг Турдишайх қишлоғида яшовчи 39 ёшли Махпура Ҳикматовани 18 йилга озодликдан маҳрум қилди. Иш материалларига кўра, аёл эрининг оиласи аъзолари овқатига заҳар қўшиб, камида тўрт марта ўлдиришга уринган.

Якунда икки инсон заҳарланиш туфайли ҳалок бўлди ва 38 киши кучли заҳарланди. Бу ҳақда ОАВ 2017 йилнинг охирида хабар берганди.

Давлат айбловчиси судланувчи аёлга 25 йил муддат сўраган. Хабар берилишича, Махпура Ҳикматова жиноят кодексининг икки моддаси бўйича айбдор деб топилди – «жиноятга тайёргарлик кўриш» ва «қотиллик».

Ҳукм жорий йилнинг январь ойи бошларида чиқарилган.

Хатлон вилояти прокурори Насрулло Маҳмудзоданинг айтишича, М.Ҳикматова, айблов хулосасига кўра, уйга эга чиқиш учун эрининг барча оила аъзоларини ўлдирмоқчи бўлган. У бунинг учун хамирга мунтазам равишда заҳар қўшган. «Ҳикматова 2014 йилдан бери нонга заҳарли кимёвий моддаларни тўрт марта қўшган», - дея айтиб ўтди Маҳмудзода.