Эрдўған АҚШнинг Туркия ва Эронга қарши фаолияти ҳақида гапирди

ИШИД террорчилик гуруҳи тор-мор этилганидан сўнг ҳам АҚШ ҳарбийларининг Сурияда қолиши Туркия, Эрон ва Россияга қарши йўналтирилган. Бу ҳақда Туркия етакчиси Ражаб Тоййиб Эрдўған маълум қилди.

«Сизлар ИШИД йўқ, деб айтмоқдасизлар. Унда нега чиқиб кетмаяпсизлар? Демак, сизда Туркияга қарши, Эронга қарши ёки, эҳтимол, Россияга қарши ҳисоб-китоблар бор», - дея президентнинг сўзларини келтирган «РИА Новости».

Эрдўғаннинг таъкидлашича, Туркия терроризм минтақа хавфсизлигига таҳдид солишда давом этса, «қатъий туриш ҳамда ҳаракат қилишни» режалаштирмоқда.

Эслатиб ўтамиз, Туркия 20 январь куни «Зайтун новдаси» ҳарбий амалиёти бошлангани ҳақида эълон қилди. Бунга АҚШнинг Сурия-Туркия чегарасида хавфсизлик отрядларини ташкил этиш бўйича режалари туртки берди.