Карлес Пучдемон Каталония етакчиси бўлишдан бош тортди 

Каталония собиқ раҳбари Карлес Пучдемоннинг маълум қилишича, мухтор ҳамжамият ҳукуматига раҳбарлик қилишдан қамоқда бўлган сиёсатчи Жорди Санчеснинг фойдасига воз кечади. Бу ҳақда у Брюсселдан мурожаатида айтиб ўтди.

"Жорди “Каталония учун биргаликда” қадриятларини энг яхши тушунадиган одам. Бу тинчликни яхши кўрувчи инсон. Бу қамоққа адолатсиз тарзда ташланган одам", - дея маълум қилди Пучдемон видеомурожаатда.

Жорди Санчес – “Каталония миллий ассамблеяси” жамоат ташкилоти собиқ раҳбари. Унга исённи ташкиллаштириш ва давлат маблағларини ноқонуний равишда сарфлаш бўйича айблов қўйилган. У иш судда кўриб чиқилгунга қадар қамоқда сақланмоқда.

"Каталония мустақил республика бўлиш ҳуқуқига эга, демократик ва ҳуқуқий… Бу мажбурий мақсад. Бу мақсад учун ичкаридан ва ташқаридан сиёсат олиб бориш лозим", - дея маълум қилди у.

Пучдемоннинг қўшимча қилишича, "яқин кунларда" Каталония парламенти аъзоларини “тантанали маросимга чақиради, унда янги босқич бошланади ва реал мустақилликка олиб борувчи йўлни кўрсатадиган Республика Кенгаши таъсис этилади”, - дея айтиб ўтди Бельгияда Испания судидан яширинаётган собиқ амалдор.