«Диана Енекеева кўча тозалашга мажбуран чиқарилмаган». Расмийлардан кутилган раддия

Каттақўрғон тумани ҳокими ўринбосари М.Музаффаров ва Самарқанд вилояти халқ таълими бошқармаси бошлиғи ўринбосари Қ.Саидов номидан Каттақўрғон туманида 14 март куни содир бўлган бахтсиз ҳодиса юзасидан расмий ахборот берилди.

Унда кейинги кунларда интернет сайтларида ва турли ижтимоий тармоқларда 14 март куни Каттақўрғон туманида содир бўлган бахтсиз ҳодиса ҳақида берилган хабарлар нотўғри талқин қилингани келтирилган.

«Кейинги кунларда интернет сайтларида ва турли ижтимоий тармоқларда 14 март куни Каттақўрғон туманида содир бўлган бахтсиз ҳодиса тафсилотлари эълон қилинди. 

Мазкур ҳолат юзасидан прокуратура идоралари қуйидагиларни маълум қилади:

2018 йил 14 март куни соат 13:00да Каттақўрғон тумани Алижон маҳалласи ҳудудидан ўтувчи М-37 йўлининг 66-километрида Акрамжон Бозорович Элмуродов Зарифжон Рижабоевич Исроилов номига расмийлаштирилган «КамАЗ» русумли 30 Y 275 JA давлат рақамли автомашинасини бошқарув ҳуқуқини берувчи ҳужжатларсиз Самарқанд йўналиши томон бошқариб бориб, йўлни кесиб ўтаётган Диана Александровна Енекеевани уриб юбориб, йўл-транспорт ҳодисаси содир этган. 

Д. Еникеева олинган тан жароҳатлари оқибатида вафот этган.

Мазкур ҳолат юзасидан Каттақўрғон ИИБ ҳузуридаги тергов бўлими томонидан Ўзбекистон Республикаси Жиноят кодексининг 266-моддаси 2-қисми билан жиноят иши қўзғатилган.

Марҳум Еникеева Диана Александровна, 1995 йил 14 июнда Каттақўрғон шаҳрида туғилган. Миллати – рус. Маълумоти – ўрта-махсус. Каттақўрғон туманидаги 42-умумтаълим мактаби ўқитувчиси. Оилали, 1 нафар фарзанди бор. Каттақўрғон шаҳар Хоразмий кўчаси, 14-уйда яшаган.

Ҳайдовчи Элмуродов Акрамжон Бозорович, 1980 йил 20 апрелда Нарпай туманида туғилган. Миллати – ўзбек. Маълумоти – ўрта. Муқаддам судланмаган. Оилали, 3 нафар фарзанди бор. Якка тартибдаги меҳнат фаолияти билан шуғулланади. Нарпай туман, Т.Розиқов маҳалласи Баландбоғ қишлоғида яшайди. 

Туман прокурори томонидан жиноят ишини сифатли ва ҳар томонлама холисона тергов қилиш юзасидан ёзма кўрсатма берилган.

Тергов ҳаракатлари олиб бориш жараёнида Д.Еникееванинг ўлими сабаби юзасидан судга оид тиббий экспертиза ҳамда йўл-улов ҳодисаси содир этган «КамАЗ» русумли юк автомашинаси бўйича судга оид автотехника экспертизаси тайинланган.

Ўрганишлар натижасига кўра, мактаб ўқитувчилари, жумладан Диана Еникеева ҳам ҳеч қандай йўл четини тозалаш, супуриш учун чиқарилмаган. 

Баҳор фаслидаги ободонлаштириш ва кўкаламлаштириш ишларининг амалга оширилиши барча жойда бажариладиган юмуш. Шаҳар-туманлар маркази, маҳаллалар, гузарлардаги хиёбонлар, кўчалар атрофи ва ариқлар четлари тозаланиши, дарахт ва гул кўчатлари экилиши бор гап. 

Мамлакатда март-апрель ойлари ободонлаштириш ойлиги, деб эълон қилингани ҳам «Тозалик бор жойда, барака бор» нақлининг амалий ифодасидир. Лекин бу эзгу ҳаракатни «Президент келиши олдидан кўча тозалашга мажбурлаш», деб тушуниш нотўғри. 

Қолаверса, бундай ишлар жойлардаги ободонлаштириш бошқармасининг ходимларининг вазифасига киради. Таълим муассасаларида эса ўқитувчилар эмас, балки хўжалик ишлари бўйича масъул ходимлар, боғбонлар шуғулланади.

Шу нуқтаи назардан, Каттақўрғонда содир бўлган бахтсиз ҳодиса, ёш педагог Диана Енекееванинг ўлимидан чуқур қайғуда эканимизни билдирган ҳолда, бу ҳодисани бошқа ҳолатларга боғлаб талқин қилиш, оммага холис туриб етказмаслик интернет тармоғидан фойдаланувчилар ўртасида салбий фикр уйғотишга сабаб бўлади, деб ҳисоблаймиз.
Мазкур ҳолат якуни бўйича маълумот жўнатилишини маълум қиламиз», дейилган хабарномада.

14 март куни Каттақўрғон туманидаги 23 ёшли мактаб ўқитувчиси Диана Енекеевани ҳамкасблари билан магистрал йўлни тозалаётган вақтида юк машинаси босиб кетди. Оғир тан жароҳати олган ўқитувчи шифохонада жон берди.

Диана Енекееванинг Каттақўрғон тумани 42-мактабдаги ҳамкасби воқеа тафсилотини ОАВга маълум қилди. Унинг айтишича, ўқитувчилар давлат раҳбарининг ташрифи арафасида «Самарқанд-Бухоро» трассаси четларини тозалаш учун катта йўлга олиб чиқилганди. Президент Шавкат Мирзиёев 17 март куни Самарқанд вилоятига борди.

«Қора «Ласетти»да келган ХТБ вакили бизга алоҳида ҳудудни чегаралаб берди. Мен унга «Бу — катта трасса, юк машиналари катта тезликда юради, одамларга яқин ерда тезликни пасайтириш лозимлигини кўрсатувчи ёки таъмирлаш ишлари кетаётганини билдирувчи белгилар қўйилмайдими, ГАИ (ДЙҲХХ) ходимлари бизга яқин ерда туришмайдими?» дедим. Аммо у «Ана, машиналарида ГАИлар ўтирибди, сизларга қарайди» дея машинасига ўтириб, жўнаб кетди. Машинадаги ГАИ ходимлари бизга яқин ҳам келишмади, бирор белги ҳам қўйилмади, бирортамизга ақалли бирорта байроқча ҳам беришмади, кейин шу фожиа содир бўлди. Биз йўл четидаги дарахтларни оқлаётган, кимдир йўлларни супураётган, Дианалар тўсиқни оҳаклаётган эди. Катта тезликда келган «КамАЗ» Дианани уриб кетди…», — деганди у.