2018 йилда ЯИМ, инфляция ва пул массаси ўсиш кўрсаткичи ҳақида маълумот берилди

2018 йилда Ўзбекистон иқтисодиётида ялпи ички маҳсулотнинг 5,9 фоиз ўсиши кутилмоқда. Марказий Банк бошқарув раиси Мамаризо Нурмуродов Ўзбекистон Республикаси Олий Мажлиси Сенатининг XIV ялпи мажлисида бу ҳақда маълум қилди.

«Жорий йилда ялпи ички маҳсулот ўсиш суръатлари 5,9 фоиз бўлиши кутилмоқда. Шунингдек, инфляция даражасини 12,4-13,4 фоиз оралиғида ушлаб қолган ҳолда реал пул массасини 12-14 фоиздан ошиб кетмаслигини таъминлаш кутилмоқда», дея раиснинг сўзларини келтиради Kun.uz мухбири.

Эслатиб ўтамиз, Халқаро валюта жамғармаси делегацияси аъзоси Альберт Егер жорий йил 14 март куни Тошкент шаҳрида ташкил этилган матбуот брифингида Ўзбекистонда ялпи ички маҳсулот ўсиши 2018-2019 йилларда 5 фоиз атрофида бўлиши прогноз қилинаётганини билдирганди.