Фарғонанинг «Нефтчи» клуби матбуот хизмати мавсумдаги муваффақиятсиз иштироки сабабларини кўрсатиб, катта баёнотни эълон қилди.
Маълумки, жамоа 9та турдан сўнг, атиги 4 очко жамғарган, бирор марта ғалаба қозонмаган ва сўнгги ўринни эгаллаб турибди.
Муваффақиятсиз иштирок сабаблари сифатида клуб янги мавсум бошланишига 31 кун қолганда Суперлигага қўшилгани, селекция ишларини олиб боришга улгурмагани, чемпионат бошлангач, жароҳатлар гирдобида қолиб кетгани кўрсатилган.
Яна бир сабаб сифатида Россиядан келган легионернинг муғомбирлик қилгани келтирилган.
Жумладан, баёнотда шундай дейилади: «Нефтчи» қисқа фурсатли селекцияда 5 нафар легионерни кўрикдан ўтказди ва улардан икки нафари Вячеслав Сушкин ва Виталий Мирний мураббийлар штабига маъқул келди. Ҳужжатлари билан боғлиқ муаммо туфайли, украиналик дарвозабон илк турни ўтказиб юборди. Ҳужумчи Сушкин билан эса кутилмаган воқеалар содир бўлиб кетди. Яъни, йиғинлар ва ўртоқлик ўйинлари чоғида ўзини ижобий тарафлама кўрсатишга муваффақ бўлган россиялик ўйинчи мавсум бошланишига кескин ўзгарди. 1-турда «Насаф»га қарши учрашувда 45 дақиқагина ҳаракатланган футболчи, йўқ жойдан жароҳатланганлар қаторини тўлдирди. Эмишки, ўйинчи йиғин чоғида жароҳат олган ҳамда тўлиқ соғайиб кетишига вақт керак бўлади. Юртимиздаги тиббиёт ходимларининг текширув натижасига кўра, Сушкин Ўзбекистонга эски, яъни, қайталаниб турадиган жароҳати билан келган. Ҳозирча, россиялик ўйинчи жиддий даволаниш билан банд. Афсуски, унинг тўлиқ ўйнаб кетишига ишонган вакилларимиз йиғиндаги бошқа ҳужумчиларнинг хизматларидан воз кечишди ва уларга жавоб бериб юборишганди».
Баёнотнинг катта қисми «Нефтчи» мухлисларига одоб-аҳлоқ нормаларидан дарс беришга бағишланган.
Унда шундай жумлалар бор:
«Истиқлол» секторларида жамоани қўллаб-қувватлаш ўрнига футболчиларни кескин ҳақорат қилиш йўлига ўтишган. Майдон текис, тўп юмалоқ. Унда хар қандай ўйинчи хато қилиши мумкин. Сўнгги пайтларда, «Нефтчи»нинг уй учрашувларида шундай ҳолатлар кузатиляптики, мухлислар майдон эгаларини ҳаттоки 90 дақиқа давомида ўз сўз бойлигидаги жамики иборалар дан фойдаланиб, ўйинчиларга босим қилишмоқда. Ҳозир футболчилар майдонда нафақат рақиб билан балки мухлисларнинг босимига қарши ҳам курашишларига тўғри келмоқда».
Кейин эса жамоа ўз мухлисларини «қўштирноқ ичидаги мухлислар» деб атаган ва қаттиқ танбеҳ бериш йўлини тутган.
