Интернетда 2018 йилнинг 1-чорагига кўра смартфонлар бозори бўйича Strategy Analytics’нинг ҳисоботи берилди.
Ҳисоботга кўра, жорий йилнинг 1-чорагида энг кўп сотилган смартфон iPhone X бўлди. Таҳлилий компания маълумотларига кўра, дунёда январдан март охиригача умумий ҳисобда 345 млн дона смартфон сотилган. iPhone X’дан эса 16 млн дона сотилган ва бу умумий сотилган смартфонларнинг 4,6 фоизини ташкил қилади.
2-4-ўринларни ҳам Apple маҳсулотлари – iPhone 8, 8 Plus ва iPhone 7 эгаллаган. Кўрилаётган давр ичида iPhone 8’дан 12,5 млн дона, iPhone 8 Plus’дан 8,3 млн дона, iPhone 7’дан эса 5,6 млн дона сотилган.
Android’да ишловчи смартфонлар фақатгина 5- ва 6-ўринни эгаллаган. Булар мос равишда Xiaomi Redmi 5A (5,4 млн дона) ва Samsung Galaxy S9 Plus (5,3 млн дона) смартфонлари бўлган.
Шунингдек, iPhone 8 ва 8 Plus март ойида энг кўп сотилган смартфонлар бўлган. Таҳлилчилар буни қурилмалар қизил рангда (RED) ҳам чиқарилгани билан боғлашмоқда.
