Назарбоев Қозоғистонда қашшоқлик 13 баробарга камайганини маълум қилди

Қозоғистонда қашшоқлик 13 баробарга камайди. Бу ҳақда Қозоғистон президенти Нурсултон Назарбоев Остона иқтисодий форуми: Global Challenges Summit 2018’да маълум қилди, деб хабар бермоқда «Казинформ».

«Қозоғистон фаол ижтимоий сиёсатни олиб бормоқда: мамлакатда қашшоқлик 13 баробарга қисқарди - 40 фоиздан 3 фоизгача, ишсизлик даражаси 5 фоиздан пастга тушди», - деди Нурсултон Назарбоев. 

Шунингдек, давлат раҳбарининг қўшимча қилишича, жорий йилда мамлакат Янги бешта ижтимоий ташаббусни ҳаётга татбиқ этишни бошлайди. «Улар арзон уй-жой билан таъминлаш, сифатли олий таълим, атроф-муҳитни яхшилаш, кичик ва ўрта бизнесни қўллаб-қувватлаш, адолатли солиққа тортиш, барқарор ривожланишга кўмаклашиш ва фуқароларимизнинг фаровонлигини оширишга қаратилган», - деди Нурсултон Назарбоев.