Украинада Малайзия лайнерини уриб туширган «Бук» Россияга тегишли бўлгани аниқланди

Нидерландия миллий полицияси суриштирувлар департаменти раҳбари Вилберт Паулиссеннинг маълум қилишича, Украина шарқида Boeing самолётининг ҳалокатга учрашини суриштирувдан ўтказиш билан шуғулланаётган халқаро тергов гуруҳи, Малайзия лайнерини уриб туширган «Бук» зенит ракета мажмуаси Россия қуролли кучлари 53-зенит ракета бригадасига тегишли бўлганини аниқлаган. Бу ҳақда РИА «Новости» хабар бермоқда.

«Тергов гуруҳи барча тасвирларни тадқиқ қилди ҳамда «Бук» зенит ракета мажмуаси қатор ноёб хусусиятларга эга эканини аниқлади. Тергов гуруҳи улар орқали бармоқ изларини олишга муваффақ бўлди. Бир неча «Бук» ўзаро таққослангач, Boeing’ни уриб туширган зенит ракета мажмуаси Россия Федерациясининг Курскдаги 53-зенит бригадасига тегишли бўлгани аниқланди», - деди Паулиссен.

У бу ҳақда Украина шарқида Малайзия лайнерининг ҳалокатга учрашини иккинчи суриштирувдан ўтказиш ишлари дастлабки якунлари тақдимотида айтиб ўтди.

МН17 рейсини амалга ошираётган самолёт 2014 йил ёзида Украина осмонида уриб туширилган эди. 

Эслатиб ўтамиз, аввалроқ Россия Донбассдаги вазият кескинлашишига нима сабаб бўлганини маълум қилганди.