Эрдўған Uber Туркияда тақиқланганини эълон қилди

Туркия президенти Ражаб Тоййиб Эрдўғаннинг маълум қилишича, Uber сервиси энди мамлакатда ишламайди. Бу ҳақда Daily Sabah хабар бермоқда.

Туркия президентининг эълон қилишича, Uber учун Туркиядаги «бизнес ўз поёнига етди».

«Бизда ўзимизнинг такси тизимимиз бор. Биз Uber’нинг тақдирини ўзимиз ҳал қиламиз», - деди Эрдўған.

Унинг қўшимча қилишича, ҳукумат сервисга турк таксичилари бизнесини «ўлдиришга» имкон бермайди. Таъкидланишича, туркиялик таксичилар Uber’га қарши чиқиб, уни ноҳалол рақобат ва бизнес юритишнинг ноқонуний усулларида айблашган.

Газетанинг қўшимча қилишича, Uber Болгария, Дания ва Венгрия каби давлатларда тақиқланган. Шу билан бирга, Франция, Италия, Германия, Япония ҳамда Тайванда сервис фаолияти чекланган.

Эслатиб ўтамиз, аввалроқ «Яндекс.Такси» ва Uber’нинг ягона платформаси Ўзбекистонда ҳам ишлаши хабар берилганди.