Тайбейда 5-9 июнь кунлари бўлиб ўтаётган Computex 2018 кўргазмасида Intel компанияси Core i7-8086K процессорини тақдим этди. У чекланган тиражда чиқарилади ва Intel’нинг Boost режимида 5 ГГц частотали илк процессорига айланади.
Core i7-8086K компания томонидан Intel’нинг x86 архитектурасига эга биринчи микропроцессори - Intel 8086 тақдим этилганининг 40 йиллигига чиқарилмоқда. У 1976 йилнинг баҳоридан ишлаб чиқила бошланган ҳамда 1978 йилнинг 8 июнь куни тақдим этилган.
Процессорнинг ўзига хос хусусиятлари қуйидагилар: LGA 1151 сокетига эга Coffee Lake-S 14-нм архитектура, 6 ядро 12 оқимли, 4 ГГц базавий частота, Boost режимида 5 ГГц, учинчи даражадаги 12 МБ кэш, UHD630 интеграциялашган графикаси, TDP 95 Вт.
Intel Core i7-8086K 8 июнь куни савдога чиқарилади. Тавсия этилган нарх ҳозирча эълон қилинмади, бироқ, дастлабки маълумотларга кўра, у $399 туради.