Қашқадарёда қўлга олинган АҚШ фуқароси шартли равишда қўйиб юборилган

Қашқадарё вилоятининг Чироқчи туманида террорчилик ташкилотига алоқадорликда гумон қилиниб 16 июнь куни қўлга олинган АҚШ фуқароси Зокир Алиев айни пайтда озодликка чиқарилган ва Чироқчи туманида истиқомат қилувчи қариндошларининг уйида бўлиб турибди. 

1972 йилда Қашқадарё вилоятининг Чироқчи туманида туғилган, 2014 йил АҚШ фуқаролигини олган Зокир Алиев мамлакатга Ўзбекистоннинг Вашингтондаги элчихонасидан виза олиб келган, аммо бир куннинг ўзида қўлга олиниб, Қарши шаҳрига олиб кетилганди. У 3 кун давомида ДХХ ҳибсхонасида ушлаб турилган.

Давлат хавфсизлик хизмати хабарида у террористик ташкилотга алоқадорликда гумон қилиниб, 2005 йилдан бери «Ўзбекистон ислом ҳаракати» фаолиятига алоқаланиб қидирувда бўлгани маълум қилинган.

KUN.UZ манбаси маълумотига кўра, у Жиноят кодексининг 155, 159 ва 223 моддаларда назарда тутилган жиноятларни содир этганликда айбланмоқда. Маълум бўлишича, Алиев дастлаблки тергов-суриштирув чоғида ўз айбига қисман иқрорлигини билдирган.

У тергов-суриштирувдан сўнг, муносиб хулқ атворда бўлиш ҳақидаги тилхат ва мамлакатдан чиқиб кетмаслик шарти билан озодликка чиқарилган.