Гўзал Исломова: «​Илк марта ҳукумат, давлат органлари ва вазирликлар тадбиркорлар билан яқиндан  ҳамкорлик қилди»​

Ўзбекистонда [солиқ концепцияси] ҳужжатининг қабул қилиниши илк марта ҳукумат, давлат органлари ва вазирликларнинг тадбиркорлар билан яқиндан ҳамкорликда иш олиб борганидан дарак беради, дейди Ўзбекистон Республикаси Президенти ҳузуридаги Лойиҳа бошқаруви миллий агентлиги директори ўринбосари Гўзал Исломова.

«Эсингизда бўлса, асосий масала тадбиркорлик субъектларининг тўлайдиган юқори солиқ юкламасидан бошланганди. Бу масала нафақат корхоналарнинг даромадлари билан, балки жисмоний шахсларнинг даромади ва иш ўрни билан боғлиқ. Шундай қилиб, мазкур концепция ҳар иккала масалага ҳам адолатли ечим беролди», дейди Гўзал Исломова 2 июль куни янги солиқ ислоҳотлари мавзусида ўтказилган анжуманда.

Kun.uz мухбирининг хабар беришича, агентлик директори кичик тадбиркорлик субъектларининг соядаги иқтисодиётдан фаол чиқишига умид боғламоқда.

«Вазиятнинг энг таҳликали жиҳати шундаки, кичик тадбиркорлик субъектлари ишчи ходимларининг сонига қараб, солиқ тўлаган. Концепция бу масалага нуқта қўяди. Эндиликда кичик тадбиркорлик субъекти деганда йиллик даромад айланмаси 1 миллиард сўмдан ошмаган ишбилармонларни тушунишимиз керак», деб қўшимча қилган у.

Эслатиб ўтамиз, ўтган ҳафтада Ўзбекистон Республикаси Президенти «Ўзбекистон Республикасининг солиқ сиёсатини такомиллаштириш концепцияси тўғрисида»ги фармонни имзолади. Унда Ўзбекистонда солиқ сиёсатини такомиллаштириш концепциясининг асосий йўналишлари белгиланганди.