Бразилия Никарагуада фуқароси ўлдирилгандан кейин элчисини чақиртириб олди

Бразилия ташқи ишлар вазири Алоизиу Нунес Никарагуада бразилиялик аёл ўлдирилгандан кейин бу мамлакатдаги элчисини ортга чақиртириб олди.

Folha de Sao Paulo порталининг маълум қилишича, элчи Луис Клаудиу Вильяфанье воқеа тафсилотлари ҳақида маълумот бериш учун ортга чақиртирилган. Шунингдек, Бразилия ташқи ишлар вазирлигига Никарагуа элчиси Лорена Мартинес чақиртирилган.

Никарагуада яшовчи 31 ёшли бразилиялик Райнейа Лима ҳукуматнинг қуролланган тарафдорлари томонидан ўлдирилган. Унинг ўлдирилганини Бразилиянинг Манагуадаги элчихонаси тасдиқлаган. Лима Манагуадаги Америка университетида таҳсил олган ва полиция госпиталида шифокор бўлиб ишлаган. 

Дастлабки маълумотларга кўра, у машинада кетаётганда қуролланган кишилар томонидан ўққа тутилган.  

Лима отасининг айтишича, қизи Никарагуада 6 йилдан бери яшаб келган ва яқин орада юртига қайтмоқчи бўлган. Лима Никарагуада давом этаётган норозилик намойишларида ҳалок бўлгани ОАВга маълум бўлган биринчи хорижлик бўлди.

Никарагуада апрелдан бери ҳукуматга қарши норозилик намойишлари давом этиб келмоқда. Бу намойишлар давомида 350 дан кўпроқ киши ҳалок бўлган. Мамлакат президенти Даниэль Ортеганинг айтишича, мамлакатга қарши фитна уюштирилган.