Навоий вилоятида Туркияда яшовчи фуқаро бошқарувидаги юк машинаси бутунлай ёниб кетди

Навоий вилояти Конимех тумани ҳудудидан ўтувчи халқаро аҳамиятга эга А-379 автомобиль йўлининг 79-км.да йўл-транспорт ҳодисаси оқибатида “МАН” русумли юк автомобилида ёнғин содир бўлган.

2018 йил 27 июль куни соат 11 дан 25 дақиқа ўтганда 1-Касбийлаштирилган ёнғин хавфсизлиги қисмининг диспетчерлик хизматига Конимех тумани А-379 Халқаро автомобиль йўлининг 79-км.да Зарафшон-Навоий йўналиши бўйлаб ҳаракатланиб кетаётган (мазкур юклар Қозоғистон Республикасидан Наманган вилоятига олиб борилаётган бўлган) Туркия давлатининг Истанбул шаҳрида яшовчи фуқаро А.Ж. бошқарувидаги “МАН” русумли катта ҳажмдаги юк ташиш транспорт воситасида ёнғин бўлаётганлиги тўғрисида фуқаро Ф.Абдуллаев томонидан қўл телефони орқали хабар келиб тушган.

Кўрсатилган манзилга ёнғин ўчириш автомобиллари соат 11 дан 28 дақиқа ўтганда етиб борган вақтда, юқоридаги манзилда ёнғин содир бўлган автомобилнинг салон, мотор қисми ва кичик тиркамаси очиқ аланга билан ёнаётганлиги аниқланган.

Ёнғин ўчириш бўлинмалари томонидан кўрилган чора ва тезкор ҳаракатлар натижасида ёнғин соат 11 дан 29 дақиқа ўтганда қуршаб олиниб, 1 та ҳаво кўпикли дастак орқали соат 12 дан 15 дақиқа ўтганда тўлиқ бартараф этилган.

Ёнғин оқибатида автомобилнинг кабинаси (салони),  двигатели, олд-орқа шиналари ва кичик тиркамаси бутунлай ёниб зарарланган.

Ёнғин оқибатида ҳалок бўлган ва тан жароҳати олган фуқаролар йўқ.

Воқеа жойи кўздан кечирилганда, автомобиль олд қисми билан йўл қатновининг ўнг томонидаги 3 метр қия пастликка бошқарувни йўқотиб қулаганлиги аниқланди.

Ёнғинни келиб чиқиш сабаби - юк автомобили ҳайдовчиси А.Ж. автомобиль бошқарувини йўқотиб, йўлнинг қатнов қисмидан ўнг томон қия пастликка олд қисми билан қулаши натижасида шикастланиб, двигатель қисмидан ёнғин келиб чиққан.