Руҳоний: Эрон дипломатияга ишонади, Вашингтонга эса ишониб бўлмайди

Эрон президенти Ҳасан Руҳоний Вашингтонни ушбу давлатга нисбатан санкцияларнинг қайта тикланиши оқибатларидан огоҳлантирди. Al Mayadeen телеканали Руҳонийнинг мурожаатидан иқтибослар келтирди.

"Америка Эронга қарши санкциялар киритгани учун афсусланади", - деди Руҳоний миллатга мурожаатида. 

Аммо у қандай жавоб чоралари кўрилиши ҳақида аниқ гап айтмади.

"Санкцияларга қарамасдан, биз дунёга сўзимизда туришимизни ва халқаро шартномалардаги мажбуриятларни бажаришимизни кўрсатамиз", - деб қўшиб қўйди Руҳоний.

Эрон президенти шунингдек, Вашингтоннинг Теҳронга нисбатан санкциялар қисман тикланиши ҳақидаги қароридан сўнг АҚШ президенти Дональд Трамп билан учрашувдан маъно йўқ деб ҳисоблашини билдирди.

"Санкциялар киритилгани учун музокаралардан ҳеч қандай маъно йўқ", - деди у.

Руҳонийнинг таъкидлашича, Трампнинг тўғридан-тўғри музокараларга чақириғи "Эронда АҚШ фойдасига бўлиниш пайдо қилишга қаратилган".

" 4+1 гуруҳи (Буюк Британия, Франция, Германия, Хитой, Россия – таҳр.) ўзининг Эрон билан бирдамлигини тасдиқлади ва Вашингтоннинг ядровий келишувдан чиқишини компенсация қилиш учун қатор чораларни кўрди", - деб қўшиб қўйди у.

"Эрон дипломатияга ишонади, Вашингтонга эса ишониб бўлмайди", - дея иқтибос келтиради Sky News Arabia телеканали Эрон президентининг сўзларидан. 

Руҳоний шунингдек, Россия ва Хитой АҚШнинг Эронга қарши санкцияларига қарши туриш ниятида эканлигини таъкидлади.

"Россия ва Хитойнинг муносабатларини Европа билан мавжуд муносабатларимизга таққослаб бўлмайди, чунки улар АҚШ босимига қарши кенг миқёсли кампанияда иштирок этмоқда, - дея унинг сўзларини келтиради Mehr агентлиги. - Россия ва Хитой банк сектори ҳамда нефть экспортида Америка санкцияларига қарши чиқишга ваъда берди. ХХР шунингдек, Арак шаҳрида атом реакторини модернизация қилиш устида иш олиб бормоқда".

Қўшма Штатлар 2016 йилнинг январида ядровий келишув имзолангани боис Теҳронга нисбатан бекор қилинган санкцияларни тиклашнинг биринчи босқичини бошлайди. Сешанба кунидан бошлаб Теҳрон билан олтин ва бошқа қатор металлар савдосига, унинг миллий валютаси билан операцияларга нисбатан чекловлар ҳамда Эрон ҳукуматига доллар сотиш борасидаги тақиқ кучга киради. Трамп шу йилнинг май ойида Эрон билан ядровий келишувдан чиқишини ва Эронга нисбатан нафақат аввалги, балки янги санкцияларни жорий этишини маълум қилганди.