«Ювентус» расмий сайти орқали яримҳимоячи Клаудио Маркизио билан хайрлашаётганини маълум қилди. Айни пайтда 32 ёшли футболчининг қайси клубга ўтаётгани ҳақида маълумот берилмаган.
Маркизио «Ювентус» мактаби тарбияланувчиси саналади. У бир йил «Эмполи»да ижара асосида тўп сурганини инобатга олмаганда, бутун фаолиятини «кекса синьора» сафида ўтказган.
Маркизио туринликлар билан Италия чемпионатида 7 карра, мамлакат кубогида 4 карра ва Италия суперкубогида 3 марта ғолиб чиққан. У, шунингдек, «Ювентус» либосида икки марта ЕЧЛ финалида ҳам ўйнаган. А Сериянинг ўтган мавсумида у 15 ўйинда майдонга тушиб, 1 та голли узатма муаллифи бўлганди.
Аввалроқ ОАВда Маркизиога «Монако» ва «Ницца» клубларидан қизиқиш бўлаётгани ҳақида хабарлар тарқалганди.