Венесуэлада кучли зилзила содир бўлди

Фото: Federico Parra/AFP/Getty Images

Венесуэла шимолидаги Сукре штатида кучли зилзила содир бўлди. Бу ҳақда Европа-Ўрта ер денгизи сейсмология маркази (EMSC) маълум қилди.

Ер силкинишлари 21 август UTC вақти билан соат 21.31да қайд қилинган.

Марказ дастлаб зилзила магнитудасини 7,3 қилиб берган, кейинроқ эса 7,0 гача пасайтирган. Бироқ АҚШ геологик хизмати маълумотларига кўра, зилзила магнитудаси 7,3 бўлган.

Зилзила ўчоғи ҳам турлича кўрсатилган: дастлаб 10 км, кейинроқ эса 113 км чуқурликда бўлгани маълум қилинган.

Зилзила бутун мамлакат бўйлаб, жумладан пойтахт Каракасда сезилган. Бинолар, автотурагоҳдаги машиналар тебранган. Гувоҳлар бу ҳолат видеолари билан ижтимоий тармоқларда бўлишишган.

Видеолардан кўринишича, ер силкинишлар бир неча ўн сония давом этган. Кўплаб одамлар кўчаларга чиқиб олишган. Зилзила оқибатида уйларнинг деворларида катта ёриқлар пайдо бўлиб, қисман қулаган. Жабрланганлар борлиги ҳақида маълумот берилмаган.

[VIDEO] #Sismo en #CiudadTiuna, #Caracas, se sintió fortísimo. Vecinos en alerta en la planta baja. Todo en calma. pic.twitter.com/WY6jMd5gF7
— Érika Ortega Sanoja (@ErikaOSanoja) August 21, 2018

TERREMOTO EN VENEZUELA | Así se sintió el fuerte temblor en Maturin, Edo. Monagas, Venezuela. Muchos salieron corriendo aterrorizados para la calle. pic.twitter.com/4PpgPMIh3J
— Yusnaby Pérez (@Yusnaby) August 21, 2018

Венесуэла ички ишлар вазири Нестор Луис Ревероль одамларни тинчлик сақлашга чақирган.

Реверолнинг маълум қилишича, Каракасдаги 200 метрлик, қуриб битказилмаган “Довуд минораси” деб аталувчи бинонинг охирги 5 қавати зилзиладан сўнг 25 фоизга ёнга оғиб қолган.

“Биз Довуд минораси эски бино ва юқори қаватларида ёриқлар пайдо бўлгани сабабли унинг қулашига тайёрланмоқдамиз. У ҳар қандай ҳаракатдан қулаши мумкин”, деб айтган Каракаснинг фуқаролик мудофааси раҳбари Либертадор Эрнана Матео.

Маълум қилинишича, бино қурилиши 1990 йилда бошланган.