Ҳафта ўйинлари. «Реал»нинг Каталонияга сафари, Бундеслигада биринчи тур ва Англияда Лондон дербиси
|15:49 / 24.08.201820 01012 мин
Куни кеча, еврокубоклардаги гуруҳ босқичида қатнашадиган жамоаларни аниқлаш учун навбатдаги учрашувлар бўлиб ўтган бўлса, бугундан Европа майдонларида миллий чемпионатларнинг навбатдаги тур ўйинлари бошланади. Эътиборга молик учрашувлар ҳақида қўйида ўқиб олишингиз мумкин.
БАВАРИЯ - ҲОФФЕНҲАЙМ (24 август, 23:30)
Ниҳоят, кучли бешликда сўнгги бўлиб, Германия Бундеслигаси ҳам старт олмоқда. Навбатдаги мавсумни чемпион жамоа очиб беради. Сўнгги олти мавсумда тенгсиз деб топилган «Бавария» энди янги мураббий Нико Ковач қўл остида еттинчи уринишни бошлайди. Рақиб эса, анойи эмас, сўнгги мавсумларда анъанавий равишда юқори ўринлар учун даъвогарлик қилиб келаётган «Ҳоффенҳайм».
Юлиан Нагелсман жамоаси ёзда энг яхши трансфер кампаниясини ўтказди, яъни ўз таркибини деярли сақлаб қолишга эришди. «Ҳоффенҳайм» каби жамоалар учун бу ҳам жуда муваффақиятли ёз ҳисобланади. Яъни, таркибдаги муҳим футболчиларни ва боғламларни сақлаб қолган ҳолда янги мавсумга кириб келишнинг ўзиёқ, жамоанинг ўтган йилгидан кучлироқ бўлишини англатади. «Ҳоффенҳайм» айниқса, мавсумолди йиғинларини кўтаринки руҳда ўтказди - етти ўйинда беш ғалаба ва икки дуранг. Бешала ғалаба ҳам йирик ҳисобда қўлга киритилди. Айниқса, «Ҳеренвен» устидан 8:2 ҳисобидаги ажойиб ғалаба, «Кьево» дарвозасига жавобсиз беш гол, Германия кубоги дастлабки босқичида сафарда «Кайзерлаутерн»ни 6:1 ҳисобида енгиш. Рақиблар у қадар кучли эмасдир, аммо ҳужумдаги сермаҳсул ўйин жамоада ўйинида муаммо йўқлигини кўрсатади.
Ўтган мавсумни «Рапид» сафида ўтказган Жоалинтонга алоҳида эътибор қаратиш мумкин. Ушбу футболчи кубок ўйинида ҳет-трик муаллифи бўлди. Меҳмонларнинг асосий ўйинчилари Крамарич, Хюбнер, Демирбай, Амири, Рупп каби футболчилар жароҳат туфайли сафдан чиқиб турган пайтда, айнан бразилиялик 22 ёшли ҳужумчи «Бавария» дарвозасига хавф солиши мумкин.
«Бавария» ҳам кубок ўйинида кейинги босқичга ўтди, камтаргина «Дрохтерсен» устидан камтар ғалабага эришди. «Бавария»ни Артуро Видал тарк этган, футболчилардан фақат Давид Алаба, Ҳамес Родригес, ҳамда Серж Гнабрининг майдонга тушиши сўроқ остида.
«Ҳоффенҳайм» «Бавария» учун у қадар ноқулай рақиб ҳисобланмайди, сўнгги 17 ўйинда атиги икки маротаба ғалаба қозонган холос. Шундай бўлса-да, айнан Мюнхендаги сўнгги беш ўйиннинг иккитасида жамоа очко олиб кетганини эътироф этиш керак.
АРСЕНАЛ - ВЕСТ ҲЭМ (25 август, 19:00)
Мавзуга оид
Лондон дербиси. Қизиқ тарафи, мавсумни янги мураббий билан бошлаган ҳар икки жамоа дастлабки икки турда мағлубият аламини тотишди. Демак, бу ўйиндаги мағлубият Эмерини ҳам, Пеллегринини ҳам истеъфога яқинлаштириши мумкин.
«Арсенал»ни тушунса бўлади, икки турда «Манчестер Сити» ва «Челси» билан ўйнашди, балки бу ўйинда жамоа очко тўплашни бошлар. Аммо «Вест Ҳэм»нинг ўз майдонида «Борнмут»дан мағлубияти жуда оғриқли бўлди. Зеро, лондонликлар ёзда энг фаол трансфер кампаниясини ўтказган клублардан бири эди. Андрей Ярмоленко, Филипе Андерсон каби футболчилар масалан, яқин яқинларда ҳам топ-жамоаларнинг эътиборидаги футболчилардан эди. Шунингдек, «Вест Ҳэм» таркибида Лукаш Фабиянски, Жек Уилшир, Лукас Перес каби футболчилар собиқ жамоаларига қарши майдонга тушишлари ўйин интригасини янада оширади.
Эсингизда бўлса, 2015 йилнинг августида «Вест Ҳэм» сафарда «Арсенал» устидан 2:0 ҳисобида ғалаба қозонганди. Бу ғалаба ғарбликлар учун ҳозирча охирги, сўнгги 15 ўйинда эса, ягона бўлиб турибди. Аммо Пеллегрини жамоаси бу ўйинда очко олишга уриниши шарт, сабаби, кейинги турларда «Эвертон», «Манчестер Юнайтед», «Челси»га қарши майдонга тушадиган жамоа турнир жадвалининг янада тубига тушиб кетиши мумкин. Англияда одатда бундай ҳолларда тақвимнинг ноқулай келгани ҳақида ўйлаб ўтиришмайди...
ЮВЕНТУС - ЛАЦИО (25 август, 21:00)
Ўтган мавсумда туринликлар учун энг ноқулай рақиб ҳисобланган жамоа айнан «Лацио» эди. Римликлар дастлаб Туринда ўтган чемпионат ўйинида 2:1 ҳисобида ғалаба қозонишган, ундан олдин эса, августда Суперкубок учун ўйинда устун келганди. Аммо март ойида Римда бўлиб ўтган ўйинда «Ювентус» сўнгги дақиқаларда Дибала томонидан урилган гол эвазига уч очко олиб кетганди. Демак сўнгги йилларда бу жамоаларнинг ўзаро ўйинлари жуда қизғин курашларда кечмоқда.
«Лацио» биринчи турда ўз майдонида «Наполи»дан енгилди, «Ювентус» эса, Веронада жуда оғир ўйиннинг сўнгги дақиқаларида 3:2 ҳисобида ғалабани илиб кетди. Ўша ўйинда рақиб дарвозасини ишғол қила олмаган Криштиану Роналдунинг дебюти ҳам айнан шу ўйинда рўй берди. Турин Роналдуни қандай кутиб олишини кўрамиз. Балки Роналду шу принципиал учрашувда А Сериядаги голлари ҳисобини очар?
Мезбонлар таркибида Маттиа Де Шильодан бошқа барча футболчилар шай ҳолатда. Индзаги эса, ҳали ҳам Марусич, Луис Филипе, ҳамда Рикардо Кишнанинг хизматларидан фойдалана олмайди.
НАПОЛИ - МИЛАН (25 август, 23:30)
Саррининг кетиши, балки «Наполи»нинг амбицияларига зарба бўла олмас, чунки Карло Анчелотти ҳар томонлама топ-мураббий ва ўтган турда Римда ғалаба қозониб, «Наполи» бу сафар ҳам осон таслим бўлмаслигини намойиш қилди. Бу давони исботлаш учун «Милан» жуда муносиб ва кучли рақиб.
Миланликлар бу ёз ҳам ўтган сафаргидек трансфер бозорида фаол бўлишди, лекин бу йилги харидлар каттароқ ва ақллироқ бўлганини таъкидлаш керак. Бонуччи «Ювентус»га қайтиб кетган бўлсада, Гонсало Игуаин ва Тьемуэ Бакойоко каби юлдуз футболчиларнинг сафга қўшилиши «Милан»нинг ниятлари жуда жиддий эканини кўрсатади. Сўнгги паллагача Сергей Милинкович-Савич борасида ҳам музокаралар бўлиб ўтганини алоҳида эслаш мумкин. Ҳа, бир пайтлар Неаполнинг ишонган тоғи бўлган Гонсало Игуаиннинг аввал «Ювентус», энди «Милан» либосида «Наполи» майдонида тўп суриши мухлислар учун оғир синов бўлса керак.
Генуядаги бахтсиз ҳодиса туфайли, ўтган турда ушбу шаҳар жамоалари майдонга тушмади, шу туфайли «Милан»нинг ҳам «Женоа»га қарши ўйини бошқа кунга қолдирилди. Демак Женнаро Гаттузонинг янги жамоаси илк синовини 2-турда ўтказади. «Милан»нинг «Наполи» устидан тўрт йилдан буён ғалаба қозона олмаётганини эътиборга олсак, жуда қийин, лекин муносиб чақириқ.
СЕВИЛЬЯ - ВИЛЬЯРЕАЛ (25 август, 23:15)
Испан футболи шинавандалари учун яна бир совға. Еврокубоклар учун курашиши мумкин бўлган икки жамоа дастлабки турларданоқ рўбарў келмоқда.
«Вильяреал»га 1-турда ҳам осон рақиб учрамади. «Реал Сосьедад» клубини қабул қилган «сариқ субмариналар» 1:2 ҳисобида имкониятни бой бериб қўйишди. «Севилья» эса, Мадридда «Райо Вальекано» устидан йирик ғалабага эришиб, тўплар нисбати бўйича турнир жадвалида пешқадам бўлиб олди.
Жамоалар ўртада кечган сўнгги учрашувлар жуда муросасиз кечган бўлса-да, натижалар борасида «Севилья»нинг яққол устунлигини кўришимиз мумкин. Ўзаро беш ўйиндан бери андалусияликлар мағлубият нималигини билмай келмоқда. Қизиғи, ўтган мавсумдаги ҳар иккала учрашув давомида «Вильяреал» 2:0 ҳисобида олдинга чиқиб олган, аммо якунда бир ўйинда рақиб ҳисобни тенглаштиришнинг уддасидан чиққан бўлса, Вильяреалдаги ўйинда «Севилья» 3:2 ҳисобида ғалаба қозонган. Ҳар икки ўйинда ҳам ҳакамлар қизил карточкани чўнтакларидан чиқаришга мажбур бўлишганди. Яъни, бу сафар ҳам жуда қизғин ва кескин кураш бўлишига асослар етарли.
«Севилья»да ҳали ҳам Себастиян Коршья таркибга қайтгани йўқ. Меҳмонлардан эса, Бруно Сориано тиззасидан жароҳат олган, шунингдек, Бонера ва Фуего тикланиш жараёнида бўлсалар-да, бу ўйинда шерикларига ёрдам бера олишмаса керак.
ЖИРОНА - РЕАЛ (27 августга ўтар кечаси, 01:15)
«Реал»нинг ушбу мавсумда Каталонияга илк сафари Жиронага бўлади. Бу ўйин алоҳида эътиборга молик эканининг сабаби, ўтган йили «Жирона» «Реал» устидан ўз майдонида ажойиб ғалабага эришган эди. Биринчи турда айтарли қийинчиликка учрамаган Лопатеги жамоаси учун миллий чемпионатдаги биринчи синов айнан Жиронада бўлиши шубҳасиз.
Англияда камида олтита топ клубнинг бўлиши деярли ҳар турда мана шундай катта ўйинларнинг мавжуд бўлишини таъминлайди. Ўтган турдаги Лондон дербисидан сўнг, мана, яна бир жиддий рақиблар - «МЮ» ва «Тоттенҳэм» ўзаро тўқнаш келмоқда.
Почеттино одатдагидек, мавсумни кичикрок жамоалар устидан ғалабалар билан бошлади. «Манчестер Юнайтед» эса, муаммолар гирдобида ўралашиб қолган. Энг ёмони, айнан асосий муаммо нима экани ҳақидаги фикрлар ҳам якдил эмас. Кимдир Моуриньонинг эскирган услубидан айб ахтарса, бошқаси, бош мураббийни трансферлар ёрдамида қўллаб-қувватламаган клуб раҳбариятини айблайди. Нима бўлгандаям, Брайтондаги мағлубиятдан кейин жуда нозик даврни бошидан кечираётган «МЮ»нинг бу ўйинда мағлуб бўлишга ҳаққи йўқ.
Статистика ҳам гўёки, мезбонлар тарафида. «Тоттенҳэм» «МЮ» майдонида ғалаба қозонишни қўйинг, сўнгги голини урганида «Олд Траффорд»нинг энг муҳим курсисида Давид Мойес ўтирарди. Шундан кейин Луи Ван Гаал (1:0, 3:0) ва Жозе Моуриньо (1:0, 1:0) икки мартадан ғалаба қозонди, «Тоттенҳэм» эса, ҳар сафар жуда ҳужумкор ва чиройли ўйин кўрсатганига қарамасдан, мағлуб бўлиб қайтаверди. Ўтган турда ўз фаолиятида илк маротаба август ойида гол уришнинг уддасидан чиққан Ҳарри Кейн балки бу сафар жамоадошларига бошқа қора анъанага чек қўйишга барҳам берар?
Таркибларга келсак, «Тоттенҳэм»да Хён Мин Соннинг Осиё ўйинларига кетганини (ё келганини) айтмасак, ҳамма жойида. «Манчестер Юнайтед» эса, аста-секин жароҳатлар гирдобидан қутулмоқда. Мавсумни бошлай олмаган Неманья Матич ва Антонио Валенсия айнан шу ўйинда сафга қайтиши кутилмоқда. Шунингдек, машғулотлардаги жароҳати туфайли Брайтонга бора олмаган ва сентябргача қайтмаслиги айтилган Алексис Санчес ҳам бу ўйинда таркибдан жой олиши мумкин экан.
