Ўзбекистон миллий кураш спорти жамоасининг 6 нафар вакили Осиё ўйинлари ярим финалига чиқди.
Ўзбекистон жамоасининг -52 кг вазн тоифасидаги вакили Гулнора Сулаймонова иштирокини саралаш босқичидан бошлади. У дастлабки рақиби, индонезиялик Мая Сари Сембирингни осонлик билан мағлуб этди ва нимчорак финалга чиқди.
Кейинги босқичда унинг рақиби қозоғистонлик Акжўл Кайипхан бўлди. Сулаймонова бу рақибини ҳам 10:0 ҳисобида таслим этди.
Чорак финалда эса у мўғулистонлик Герелма Эрденетсогтни 10:0 ҳисобида енгди ва ярим финал йўлланмасини қўлга киритди.
Энди у финал йўлланмаси учун ҳиндистонлик Ядҳав Малапрабҳа Яллаппага қарши гиламга чиқади.
-52 кг вазн тоифасидаги Ойсулув Абдумажидова эса баҳсларга нимчорак финалдан киришди. У дастлаб туркманистонлик Анастасия Макеевага қарши гиламга чиқиб, 5:0 ҳисобида ғалаба қозонди. Чорак финалда эса эронлик Таҳира Азарпайванд билан беллашган ўзбекистонлик спортчи қийин ғалабани қўлга киритиб (5:0), ярим финалга чиқди.
Энди Абдумажидова финал йўлланмаси учун ҳиндистонлик Пински Балҳара билан беллашади.
Бунгача -66 кг вазн тоифаси вакиллари Маъруф Ғайбуллоев ва Руслан Бўриев, +90 кг вазн тоифасида иштирок этаётган Муҳсин Ҳисомиддинов ва Нурбек Тўраев ҳам ярим финал иштирокчиларига айланди. Бу эса ярим финал беллашувларидан олдин Ўзбекистон жамоаси 6 медални нақд қилганини англатади.