Президент Қирғизистонга ташрифини якунлади

Ўзбекистон Республикаси президенти Шавкат Мирзиёев Қирғизистон Республикаси президенти Сооронбай Жээнбековнинг таклифига биноан 3 сентябрь куни Туркий тилли давлатлар ҳамкорлик кенгаши саммитида иштирок этди.

Давлат раҳбари Қирғизистонга ташрифини якунлаб, мамлакатга жўнаб кетди, деб хабар бермоқда президент матбуот хизмати.

Ўзбекистон Республикаси президенти Шавкат Мирзиёев ва Венгрия Республикаси бош вазири Виктор Орбан юқоридаги анжуманда фахрий меҳмон сифатида қатнашди.

Давлат раҳбари саммитда сўзлаган нутқида халқларни ўхшаш тил, муштарак маънавий қадриятлар ва ҳамкорлик ришталари бир-бирига боғлаб келаётгани, бугунги кунда Кенгашнинг сиёсий кун тартибида ҳеч бир муаммо ёки келишмовчилик мавжуд эмаслигини қайд этди.

“Туркий кенгаш доирасида ўзаро самарали ҳамкорликни янада ривожлантиришдан манфаатдормиз. Ҳозирги босқичда унинг фаолиятида мамлакатимиз учун амалий жиҳатдан қизиқиш уйғотадиган йўналишлар бўйича иштирок этишга тайёрмиз”, деди Шавкат Мирзиёев.