Прогнозларга кўра, 1-2 кун ичида АҚШнинг шарқий соҳилларига ёпириладиган “Флоренс” довулидан кўриладиган зарар камида 27 млрд долларни ташкил қилиши мумкин. Бундай баҳони Bloomberg ахборот агентлиги келтириб ўтди.
Шу сабабли “Флоренс” АҚШнинг замонавий тарихидаги энг вайронкор довуллар ўнталигига кириши мумкин. Агентликнинг таъкидлашича, АҚШ ҳукумати 2005 йилда Луизиана штатига ёпирилган “Катрина” довулидан вайрон бўлган инфратузилмани тиклашга энг кўп пул сарфлаган. Довул ўшанда 160 млрд долларлик зиён етказган.
Атлантика океанида вужудга келган “Флоренс” довули кучи охиргидан битта олдинги 4-даражагача етган. Айни вақтда у Жанубий Каролина штатидан 800 кмча узоқликда жойлашган. Довулдаги шамол тезлиги 60 м/сонияни ташкил қилмоқда. У АҚШ соҳилларига 14 сентябрда етиб келиши кутилмоқда.
Виржиния, Шимолий Каролина, Жанубий Каролина, Мэриленд штатлари ва пойтахт Вашингтонда довул келиши сабабли фавқулодда вазият тартиби киритилган. Шимолий ва Жанубий Каролинада соҳилбўйида яшовчи 1,5 млндан кўпроқ одам эвакуацияси эълон қилинган. Об-ҳаво мутахассисларининг огоҳлантиришича, довул фалокатли тошқинларга олиб келиши мумкин.
