Интерпол президенти Хитой ҳокимияти томонидан коррупцияда айбланмоқда — Parisien

Хитой ҳокимияти Интерпол президенти ва шу давлат фуқароси Мэн Хунвэйни коррупцияда айбламоқда. Бу ҳақда шанба куни Le Parisien газетаси «бир қатор манбалардан олинган ва бири бирини тасдиқловчи маълумотлар»га асосланиб хабар берган.

Газета илгари сураётган тахминга кўра, Мэн Хунвейга нисбатан «кибержиноятчиликка қарши курашиш соҳасида фаолият кўрсатаётган компаниялардан бирига шартнома олишда ноқонуний ёрдам бериш» айблови қўйилиши мумкин. Бир вақтнинг ўзида нашр «Франциядаги бир қатор ишончли манбалар 2016 йилнинг охирида Интерпол раҳбари этиб сайланган Мэн Хунвейни Хитойда коррупцияга қарши кураш кампаниясини ўтказиш баҳонасида лавозимни четлаштириши мумкинлигини айтишаётгани»ни қайд этган.

Жума куни Хитойнинг South China Morning Post газетаси журналистларда мавжуд маълумотларга кўра, Мэн Хунвэй Хитойда тергов остида эканлигини маълум қилди. Нашр маълумотларига кўра, Интерпол президентини Хитойга 29 сентябрь куни учиб келганиданоқ сўроққа олиб кетишган. У айни пайтда қаердалиги, сўроққа тутиш учун қандай асослар борлиги ҳақидаги ахборот берилмаяпти.

Сирли йўқолиш

Интерпол президенти Мэн Хунвэй 29 сентябрь куни Стокҳолмдан Хитойга авиарейс билан жўнаган. Сўнгги марта у ўтган шанба куни алоқага чиққан, деб ёзади AFP агентлиги. Лион шаҳри прокуратураси (Франциянинг марказий қисми) Интерпол президентининг «ташвиш туғдирувчи ҳолатда бедарак йўқолиши» туфайли суриштирув ишларини бошлаган. Суриштирув ишларини олиб бориш Ҳудудлараро махсус юридик гуруҳга топширилган.

Europe1 радиостанциясининг маълумотларига кўра, айни пайтда Интерпол штаб-квартираси жойлашган Лион шаҳрида фарзандлари билан истиқомат қилаётган Мэн Хунвэйнинг рафиқаси терговчиларга аллақачон кўрсатма берган. Боз устига, у ўзига телефон орқали руҳий босим ва қўрқитиш уюштирилаётгани, қўнғироқ қилаётганлар хитой тилида гапиришаётганини айтиб ўтган. Le Monde газетасининг маълумотларига кўра, Мэн Хунвэйнинг рафиқаси Француз ҳокимиятига ўзини ҳимоялашни сўраб мурожаат қилган ва унинг илтимоси қондирилган.

Халқаро полиция ташкилотидагилар эса жума куни ТАСС мухбири саволларига жавоб беришар экан, хитой вакилининг йўқолиши «Франция ва Хитойдаги тегишли органларнинг ваколатига киради», дея таъкидлашган. Интерполдагилар шунингдек, ташкилотнинг асосий фаолияти билан президент эмас, бош котиб шуғулланишини ҳам эслатиб ўтишган.

Шанба куни Интерпол ХХР ҳокимиятига ташкилот президенти Мэн Хунвейнинг турган жойи борасидаги маълумотни аниқлаштириш учун расмий сўров юборган. Интерпол ҳуқуқ-тартибот органларининг расмий канали орқали Хитой ҳукуматидан Мэн Хунвейнинг статусига аниқлик киритишни сўраган, дейилади баёнотда. Унда Интерпол бош котиби Юрген Шток президентнинг аҳволидан ташвишланишни бартараф этиш учун Хитой ҳокимиятидан расмий жавобни кутаётгани алоҳида қайд этилган. Бу баёнот ташкилот бош котибининг Twitter’даги саҳифасида, шунингдек, Интерполнинг сайтида жойлаштирилган.