Жиноят ишлари бўйича Навоий вилоят судида Ўзбекистон Республикаси Жиноят кодексининг ўта оғир моддалари бўйича айбланаётган Зокир Раҳимов устидан олиб борилаётган суд иши ўз ниҳоясига етди.
2018 йил 1 ноябрь куни бўлиб ўтган суд мажлисида судланувчи Зокир Раҳимовга ҳукм ўқилди, деб хабар қилмоқда Kun.uz’нинг маҳкама жараёнида қатнашган мухбири.
Зокир Раҳимов Ўзбекистон Республикаси Жиноят кодексининг 155-моддаси 3-қисми “а”, “б” бандлари, 159-моддаси 4-қисми, 242(2)-моддаси 2-қисми, 223-моддаси 2-қисми, “б”, “в” бандлари, 244(1)-моддаси, 1-қисми билан айбдор деб топилди.
Зокир Раҳимовга узил-кесил 17 йил муддатга озодликдан маҳрум қилиш жазоси тайинланди. Жазо умумий тартибдаги колонияда ўталиши белгиланди.