Тошкентдаги боғчада жуда катта миқдорда маблағлар талон-тарож қилингани аниқланди

Тошкент шаҳрининг Шайхонтоҳур туманидаги мактабгача таълим муассасаси мансабдор ва моддий жавобгар шахсларига нисбатан жиноят иши қўзғатилди. Бу ҳақда Kun.uz’га Бош прокуратура матбуот хизмати хабар берди.

Қайд этилишича, Шайхонтоҳур туман 197-сонли мактабгача таълим муассасасида содир этилган қонунбузилиш ҳолатлари юзасидан 2018 йил 20 сентябрь куни туман прокуратураси томонидан терговга қадар текширув ҳаракатлари ўтказилган.

Текширув натижасига кўра, 197-сонли мактабгача таълим муассасаси мансабдор ва моддий жавобгар шахсларига нисбатан 22 сентябрь куни Жиноят кодексининг 167-моддаси 2-қисми «а» банди билан жиноят иши қўзғатилди.

Билдирилишича, жиноят иши бўйича бюджет ва бюджетдан ташқари маблағларнинг шаклланиши ва мақсадли сарфланиши, товар моддий қимматликларнинг кирим-чиқим қилиниши ва сақланишини текшириш мақсадида ўтказилган тафтиш натижасида, муассасада 2016-2018 йиллар даврида иш ҳақлари учун маблағлар асоссиз тўлангани ва бошқа қонунбузилиш ҳолатлари оқибатида жуда катта миқдордаги маблағлар талон-тарож қилинганлиги аниқланган.

Ушбу ҳолат юзасидан Мактабгача таълим вазирлигининг Ички аудит ва молиявий назорат ходимлари томонидан 197-сонли мактабгача таълим муассасасида текшириш ўтказилган бўлиб, тўпланган текшириш ҳужжатлари жиноят иши материалларига қўшилган.