Payme GO контактсиз тўловлари korzinka.uz ва Redtag дўконларида ишга тушди

Korzinka.uz ва Redtag дўконларида Payme GO контактсиз тўловлари ишга тушди. Шунингдек бир ой давомида пулли ютуқлар акцияси ўтказилади.

Контактсиз тўловлар ҳақида кўпчилигимиз эшитганмиз, аммо амалда уни ишлатиб кўрганлар орамизда кам. Payme ҳамда korzinka.uz ҳамкорликда korzinka.uz ва Redtag дўконларида контактсиз тўловлар қабул қилишни йўлга қўйишди. Расман хизмат 23 ноябр куни ишга тушганлиги эълон қилинди ва Payme GO орқали тўловни амалга оширган ҳар бир абонент Payme томонидан ўтказиладиган акция доирасида пул ютуқлари ўйини иштирокчисига айланиши маълум қилинди.

Саволларга Payme компаниясининг асосчиси Сарвар Рўзматов жавоб беради:

- Контактсиз тўловлар хизматимизни Payme GO деб номладик. Биз бу хизматни 2017 йилда бир нечта алоҳида савдо масканларида ишга тушириб кўргандик. Энди эса уни энг йирик савдо дўконлар тизимида ишга тушиши нафақат бизнинг компаниямиз учун, балки мамлакатимиздаги контактсиз тўловлар соҳасида ҳам катта қадам ҳисобланади. Биз korzinka.uz ҳамда Redtag мижозларини яқиндан ўрганиб чиқдик ва айнан улар ушбу йўналишнинг ривожланишида асосий туртки бўлишларига умид қиламиз.

Payme GO қандай ишлайди?

- Контактсиз тўловни амалга ошириш учун мобил телефонга Payme иловасини юклаб олиш керак. Иловани очгандан сўнг меню бўлимида Payme GO хизматини танлаш лозим. Шунда телефон экранида QR код пайдо бўлади. Ушбу QR кодни кассадаги сканерга яқинлаштирганда тўлов суммаси автоматик тарзда картадан ечилади. Барча чеклар тўловлар тарихида сақланади. Айтгандек, хизмат интернетсиз ҳам ишлайверади.

Бу қанчалик хавфсиз?

- Хизмат бутунлай хавфсиз ҳисобланади. Ҳар 30 сонияда янги QR код ҳосил қилиниб, бу экранни расмга олиб ушбу кодни қайта ишлатилишига йўл қўймайди. Шунингдек хизмат халқаро PCI DSS сертификатига эга.

Саволларга korzinka.uz асосчиси Зафар Ҳошимов жавоб беради:

- Контактсиз тўловларнинг татбиқ этилиши харидорларимизга янада кўпроқ қулайлик яратади деб ўйлайман. Харидор, ёнида пластик картаси бўлмаган тақдирда ҳам, ўз смартфони орқали тўловни амалга ошириши мумкин. Шунингдек ушбу хизмат жуда тез ишлашига, карта ёки нақд пул орқали тўлагандан анча тезроқ эканлигига амин бўлдик. Бу эса кассаларда навбат тезроқ силжишига ёрдам беради.

Ҳозирча хизмат фақат пойтахт Тошкент ҳамда Олмалиқ шаҳарларида татбиқ этилди. Тез орада бошқа вилоятлардаги дўконларимизда ҳам контактсиз тўловларни амалга оширмоқчимиз, чунки тўлов тизимларидан бутун республикамизда фаол фойдаланилаётганини кўрмоқдамиз.

Бунда бонус карталари ҳам ишлайдими?

- Ҳа бонус тизими аввалгидек ишлайверади.

Акция ҳақида

Хизматнинг ишга тушиши муносабати билан Payme фойдаланувчилар орасида пул ютуқлари ўйинини ўтказишга қарор қилди.

27.11.2018 дан 31.12.2018 гача korzinka.uz ёки REDTAG дўконларида қилган 20 000 cўмдан ошиқ харидларингизга Payme GO орқали тўловларни амалга оширганингизда пул ютуқларига эга бўлишингиз мумкин. Ғолиблар ҳар куни аниқланиб борилиб, 100 000 сўмдан 300 000 сўмгача миқдорда турли ютуқлар ғолибларнинг банк карталарига тушириб берилади.

Пул ютуқлари ўйини иштирокчисига айланиш учун қуйидагиларни бажариш керак:

1 – Payme иловасини юклаб олиш: https://payme.uz/getapp

2 – Payme GO мавжуд бўлган korzinka.uz ёки REDTAG дўконларида Payme GO орқали тўловни амалга ошириш.