Ўтган ҳафта Марсга қўнган АҚШнинг Mars InSight станцияси илк бор Қизил сайёрадаги шамол овозини ёзиб, уни Ерга жўнатишга муваффақ бўлди. Бу ҳақда NASA директори Жим Брайденстайн маълум қилди.
“Инсонлар аввал ҳеч қачон Марсдаги шамол овозини эшитишмаган! Mars InSight ёзиб олган Марсдаги шамол овозини тинглаб кўринг”, деб ёзган Брайденстайн твиттерда.
BREAKING: Humans have never before heard the sound of wind on Mars until now! Listen to #SoundsOfMars as recorded by @NASAInSight as Martian winds swept over our lander. Best with headphones or a subwoofer. https://t.co/VreQxcAnAM pic.twitter.com/yd98NgZgR3
— Jim Bridenstine (@JimBridenstine) December 7, 2018
NASA’да таъкидланишича, 1 декабрда станция датчиклари тезлиги 5 м/сониядан 7 м/сониягачани ташкил қилган шамолнинг паст частотали овозини ёза олган. “Миссиямизнинг вазифаларидан бири Марсдаги ҳаракат кўрсаткичларини ўлчашдан иборат”, деб айтган Марсни тадқиқ қилиш дастури раҳбари Брюс Банердт.
Mars InSight станцияси 480 млн км масофани босиб ўтиб ўтган ҳафта Марсга қўнган. У Қизил сайёрага қўнганидан 7 дақиқа ўтиб у ердан сайёрамизга илк фотосуратни жўнатган.
Яратилишига 828 млн доллар сарфланган автоматик станция 5 май куни Калифорниядаги Ванденберг космодромидан учирилган.
