Руҳоний АҚШ сиёсатини террорчиликка қиёслади

Эрон президенти Ҳасан Руҳоний АҚШ президенти Дональд Трамп сиёсатини террорчиликка қиёслади. Бу ҳақда “Ал-Муаззин” телеканали маълум қилди.  

Трамп бундай “ўхшатиш”га Эрон билан ядровий битим бўйича ҳаракатлар режасидан чиқиш қарори учун “тақдирланган”.  

“Американинг ядровий битимдан чиқиши – Эронга қарши иқтисодий террорчиликнинг кўринишларидан биридир”, деб айтган Руҳоний. Эрон президенти бу ҳақда Эрон, Россия, Хитой, Туркия, Покистон ва Афғонистон парламенти раҳбарларининг анжуманида айтиб ўтган. Анжуман террорчиликка қарши курашга бағишланган. 

Руҳоний Эрон террорчиликни йўқ қилиш учун катта ҳақ тўлаганини, унга қарши кураш ҳали ҳам давом этаётгани ва саъй-ҳаракатларни бирлаштирмасдан иложсиз эканлигини қайд қилиб ўтган. Эрон президентининг фикрича, унинг давлати иқтисодий террорчиликка тўқнаш келмоқда, бу террорчилик тарафдорлари эса “минтақада зиддият ва муаммоларни чуқурлаштиришга” интилмоқда.