«Пул тўлашга борсанг, ходим йўқ». Фарғона коммунал идораларида турнақатор навбатлар

Хонадонда ишлатиладиган электр, газ, сувга вақтида тўлов қилиш ҳақида ОАВ орқали айтилавериб, аҳолининг қарашлари ўзгартирилди.

Халқимиз айтилган гапни тушунади. Энди одамлар ҳар ойнинг ўнинчисигача коммунал идораларига бориб, ишлатилган энергия, газ, сув учун пул тўлашга ўрганишди. Тўламаса, МИБ билан муаммолар бошланади.

Бироқ, олдинлари «ҚАРЗДОРЛИК КЎП. ТЎЛАШМАЯПТИ», деб бонг урадиган коммуналчилар, асли ўзлари вақтида тўловларга тайёр эмас экан.

Фарғоналик ўқувчиларимиздан бири алоқага чиқди. «Қиргули газ идорасига тўлов қилиш учун бордим. Навбат учун 35 киши бор. Уч ярим соатда галим келди. Эрталаб, соат 9да кириб, соат 11:30да чиқдим. Навбатда турганлар орасида асаббузарлик, келишмовчилик одатий ҳолга айланган. Сўнг электр учун пул тўлагани Марғилон электр тармоқлари идорасига борсам (ҳудуд бўйича шу ерга қараймиз), 50-60 одам навбатда турган экан. Соат 12дан ўтганда касса ходимлари тушликка чиқиб кетишди. Шунча одам сарсон, ё кетишини билмайди, ё кутишини.

Марғилондаги «Қишлоққурилишбанк», «Агробанк» офисларига кирсам, улар электр энергиясига пул қабул қилишмас экан. Истеъмол қилинган электр учун пул тўлай олмай қайтиб келдим. Электр тармоқлари идораси ходимлари «Ойнинг 15-20 саналаридан кейин келсангиз, одам кам бўлади», дегани ортиқча бўлди. Ахир, МИБ ҳар куни, «Тўловни ойнинг ўнинчисигача амалга оширинг!», деб турибдику?».

Фуқаронинг эътирози жуда ўринли. Ҳозир, қайси шаҳар ёки туман марказидаги коммунал соҳа идорасига борсангиз, узундан-узун навбатларни кўрасиз. Кассир, яъни пул қабул қилувчи ходимлар сонини кўпайтириш масаласи соҳа мутасаддилари учун ҳеч долзарбга ўхшамайди.

Яна уларда бошқа муаммо ҳам чиқиб туради. Ё база ишламай қолади, ёки интернет. Шаҳар ва туман марказларига пул қабул қилиш шохобчалари ташкил қилинса ва ўша қабул қилиш шохобчалари дам олиш кунлари ҳам ишласа, одамлар иш кунида сарсон бўлмас эди.

Соҳа вакилларининг банклар билан алоқаси ҳам йўлга қўйилиши керак.

Сизда савол туғилиши мумкин: «Телефондан «Клик» орқали ўтказиб қўйса бўлмайдими?». Бўлади. Лекин, МИБ квитанция сўрайди. Кейин, телефон орқали юборилган суммани ойнинг 10-санасигача коммунал соҳа идорасига бориб, ўз ҳисоб дафтарчангизга қайд эттириш ҳам керак...

Мазкур соҳада аҳолини қийнаб келаётган муаммолар кўп. Энди уларнинг ечими устида бош қотиришса бўлар эди...

Элмурод Эрматов
KUN.UZ мухбири