Европа футбол агентлари ассоциацияси (EFAA) ва Европа клублари ассоциацияси (ECA) томонидан таъсис этилган «Globe Soccer Awards» йиллик мукофотлари ўз соҳибларига топширилди.
Дубайдаги «Бурж Ал Араб» меҳмонхонасида бўлиб ўтган тақдирлаш маросимида Португалия терма жамоаси ҳужумчиси Криштиану Роналду 2018 йилнинг энг яхши футболчиси деб эълон қилинди. Ўтган йили ёзда «Реал»дан «Ювентус»га кўчиб ўтган юлдуз қаторасига учинчи марта, жами тўртинчи маротаба «Globe Soccer Awards» таснифида йил футболчиси деб эътироф этилди.
Роналду якуний учликка киритилган Антуан Гризманн ва Килиан Мбаппени ортда қолдирган. Криштиану, шунингдек, «433 мухлис» совринига ҳам лойиқ кўрилган. Ушбу мухлислар гуруҳи футбол оламининг энг йирик бирлашмаларидан саналади.
ЖЧ-2018да Франция терма жамоасини чемпионлик сари етаклаб борган Дидье Дешам йилнинг энг яхши мураббийи деб топилди.
Маросимда «Атлетико» «Йилнинг энг яхши клуби» дея тан олинди. Мукофотни клуб бош ижрочи директори Мигел Анхел Гил Марин қабул қилиб олди.
Франция терма жамоаси ва «Ювентус» яримҳимоячиси Блез Матюидига «Футболчилик карьераси» соврини топширилди. Ушбу совриннинг собиқ футболчилар учун номинациясида бразилиялик Роналдо эътироф этилди.
Роналдунинг агенти Жорже Мендеш «Йилнинг энг яхши агенти» мукофотини қўлга киритди.
«Йилнинг энг яхши спорт директори» номинациясида «Ювентус»даги ушбу лавозим эгаси Фабио Паратичи ғолиб деб топилди.
Таниқли италиялик собиқ мураббий Фабио Капелло «Мураббий карьераси» соврини билан тақдирланди. Эслатиб ўтамиз, 72 ёшли мутахассис «Милан», «Рома», «Реал», «Ювентус» каби клублар, Англия ва Россия терма жамоаларини бошқарган.
Маълумот учун, кечаги Gala Dinner`да ECA ва EFAA томонидан ўнинчи маротаба «Globe Soccer Awards» мукофотлари ўз эгаларига топширилди. Илк марта учта йўналишда энг яхшиларни аниқлаган ташкилотчилар ҳозирга келиб 15га яқин номинацияда лауреатларни тақдирлайди.
