Интерпол собиқ раҳбарининг рафиқаси Францияда бошпана сўради 

Интерполнинг собиқ раҳбари, ҳозирда Хитойда тергов қилинаётган Мэн Хунвэйнинг рафиқаси Францияда бошпана берилишини сўради. Бу ҳақда France Info радиостанцияси хабар берди. 

“Франция ҳукумати мени ҳимоя қилиши, менга ва фарзанддларимга ёрдам бериши керак”, деб айтган Грейс Мэн.

Аёлнинг айтишича, 2018 йил кузида уни ўғирлаб кетишмоқчи бўлишган. Унинг маълум қилишича, октябрда унинг ёнига икки хитойлик тадбиркор келиб, унга улар билан бирга Чехияга хусусий самолётда учишни таклиф қилган. Грейс Мэннинг таъкидлашича, хитойликлар икки кундан кейин яна келиб, унга бу гал Европа шаҳарлари бўйлаб турга жўнашни таклиф қилишган. Аёл уларга рад жавобини берган.

“Шу уринишдан кейин полицияни огоҳлантирдим”, деб маълум қилган аёл.

Бундан ташқари, Хитойнинг Лиондаги консуллиги унга турмуш ўртоғидан хат борлигини, бироқ уни олиш учун аёлнинг шахсан ўзи келиши кераклигини хабар қилган. Аёл мактубнинг Франция полицияси орқали берилишини сўраган, бироқ у ушбу илтимосига Хитой томонидан жавоб олмаган.

Франция ОАВ маълумотларига кўра, Грейс Мэн ҳозирда Интерпол бош қароргоҳи жойлашган Лионда қолмоқда.

Октябрь бошида Францияда Мэн Хунвэйнинг йўқолиб қолиши юзасидан тергов бошланган. Унинг йўқолиб қолгани ҳақида рафиқаси маълум қилган. 

Кейинроқ Хитой томони Мэн Хунвэй Хитойда коррупция иши бўйича тергов остида эканлигини маълум қилган.  

Мэн Хунвэй 7 октябрда Интерпол президенти лавозимидан кетишини маълум қилган.