Миллий хоккей лигасидаги «Вашингтон Кэпиталс» клубининг россиялик ҳужумчиси Александр Овечкин Стэнли кубогидаги ғалабага бағишлаб АҚШ президенти Дональд Трамп билан бўлиб ўтадиган учрашувда Трампдан нима ҳақида сўрашини айтди. Унинг сўзларини «Спорт-Экспресс» келтирмоқда.
Овечкин Трамп билан учрашувга албатта боришини айтган. Хоккейчининг сўзларига кўра, у Трампдан АҚШ ва Россия ўртасидаги муносабатлар қачон яхшиланишини сўрамоқчи.
Овечкиннинг қайд этишича, у сиёсатдан узоқда.
«Сиёсат бу алоҳида суҳбат. Мен учун энг асосийси, ҳамма соғ-саломат ва дунёда тинчлик бўлишидир», — деган ҳужумчи.
Овечкин 2005 йилдан буён «Вашингтон» таркибида ўйнайди. Ўтган мавсумда у фаолиятида илк бор Стэнли кубогини қўлга киритди.
