Колумбияда наркобарон Эскобарнинг уйи бузиб ташланди

22 февралда Колумбиянинг Медельин шаҳрида 1993 йилда полиция билан отишмада ўлдирилган наркобарон Пабло Эскобар ўз оиласи билан яшаган, “Монако” номи билан маълум бўлган уй бузиб ташланди.  

8 қаватли уй назорат қилинувчи портлатиш ёрдамида бузиб ташланган. Уй ўрнида наркомафия қурбонлари хотирасига ёдгорлик мажмуаси барпо этишга ваъда қилинган. Бино шаҳар ғарбидаги Эль-Побладо деб номланган нуфузли туманда жойлашган бўлган. Эскобар бу уйни 1988 йилда унга суиқасд уюштирилгандан кейин тарк этган.

2018 йил сентябрда шаҳар маъмурияти Эскобарга бағишланган уй-музейни ёпишга қарор қилганди. Музей Эскобарнинг акаси томонидан бошқарилган.

Пабло Эскобар ХХ асрнинг энг ашаддий жиноятчиларидан бири сифатида тарихга кирган. Эскобар ҳақидаги кўплаб китоблар, Медельиндаги у билан боғлиқ сайёҳлик турлари сабабли шаҳарнинг баъзи одамлари наркобароннинг ҳаёти қаҳрамонлаштирилиши ва афсонага айлантирилишидан хавотир билдиришган.   

Ўтган ҳафта Эскобар эрмак учун кўп йиллар аввал ўз ер мулкида боққан 3 тонналик бегемотлар кўпайиб кетгани ва катта ҳудуд бўйлаб тарқалиб кетгани маълум қилинган. Экологлар ушбу жонзотларни маҳалий аҳоли ва табиат учун хавфли деб ҳисоблашмоқда. Ўтган йиллар давомида уларнинг сони 4 тадан 50 тагача кўпайган.

Эскобарнинг ҳайвонат боғида бегемотлардан ташқари, каркидон, фил ва жирафалар каби юзлаб экзотик ҳайвонлар сақланган.